Суруйарга холонор эдэр ааптар, Чурапчыттан төрүттээх «Айар аартыкпыт аргыстара» эдэр ыччат түмсүүтүн чилиэнэ, "Ситим" медиабөлөх "Бэлэм Буол" саайтын эрэдээктэрэ Ираида Федоровна Коркина-Чугдаара "Сиэрдээх Арассыыйа" литературнай бириэмийэтин биир лауреата буолла.
Муус устар 23 күнүгэр Москва куоракка "Сиэрдээх Арассыыйа" партия быйыл алтыс сылын литературнай бириэмийэтин дьоро чааһа 1780-с сыллардаахха тутуллубут эриэккэс көстүүлээх, классика истииллээх аатырбыт «Дом Пашкова» диэн дыбарыаска буолан ааста. Манна Арассыыйа араас регионнарыттан бириэмийэҕэ тиксибит эдэр суруйааччылары, "Проза", "Поэзия" уонна "Публицистика" жанрыгар кыайыылаахтары чиэстээтилэр. Ираида прозаҕа "Разорванная нить" диэн кэпсээнинэн ("Быстыбыт ситим" кэпсээн тылбааһынан) кыттыбыт. Хас биирдии жанрга хас даҕаны лауреат уонна үс кыайыылаах аатын биллэрбиттэр. Биһиги кыыспыт лауреаттартан биирдэстэрэ буолбут.
Ираида үөрүүлээх сонунун быһа тардан маннык кэпсиир:
«Олус долгутуулаах, үрдүк таһымнаах тэрээһиҥҥэ кыттыбыппыттан, буолаары буолан лауреат буолбуппуттан дьоллоннум. Үйэбэр маҥнайгыбын маннык күрэххэ кытынным. Тэрээһин буолуон иннинэ шампааннаах, минньигэс астардаах фуршет уонна сэдэх көстүүлээх кинигэ экземплярдарын кытта билсиһии экскурсията буолбута. Литературнай бириэмийэ үөрүүлээх чааһыгар биллэр-көстөр дьон кыттыыны ылбыттара, эҕэрдэ тыл эппиттэрэ. Ол курдук, "Сиэрдээх Арассыыйа" лидерэ Сергей Михайлович Миронов, Арассыыйа Үтүөлээх артыыһа, киинэ артыыһа, суруйааччы Владимир Конкин, «А зори здесь тихие» уус-уран киинэҕэ сүрүн оруолу оонньообут, билиҥҥитэ Судаарыстыбыннай Дуума дьокутаата Елена Драпека, Партия президиумун чилиэнэ Руслан Татаринов уо.д.а. Бу күн олус долгуйан уонна бириэмэтэ ыгым даҕаны буолар соччо кимниин даҕаны чугастык билсибэтим, ол эрэн дьон бары миигинниин бэйэлэрэ ыҥыран туран хаартыскаҕа түстүлэр, сорох "наһаа кыраһыабайгын" диэн комплимент биэрдэ. Бэйэм бу күн сахалыы маҥан халадаайбын, илин кэбиһэрбин кэтэн барбытым. Хаһан даҕаны маннык болҕомтоҕо тиксибэтэх буоламмын долгуйбутум таспар биллэр быһыылаах этэ. Биир Арассыыйатааҕы литературнай сурунаал эрэдээктэрэ визиткатын биэрдэ:"Саха сириттэн эдэр суруйааччылар айымньыларгытын ыытар буолуҥ",- диэтэ. Маны таһынан Сергей Мироновтуун, Драпекалыын кыратык алтыһан, аҕыйах тылынан кэпсэтэн ыллым. Оттон Владимир Конкин кинилиин хаартыскаҕа түспүппүн кэннэ:"У вас замечательный рассказ, есть потенциал, отличное начало, дерзайте, желаю дальнейших успехов", - диэн үөртэ уонна наһаа эйэҕэстик мичийэн ылла. Кини дьүүллүүр сүбэ чилиэннэриттэн биирдэстэрэ этэ. Уопсайынан, эдэр суруйар ыччаттарга бу курдук күрэхтэргэ харса суох кыттан иһин диэн ыҥырабын».
Эдэр суруйааччыга бу бүтүн Арассыыйа таһымнаах далааһыннаах айар күрэххэ чаҕылхай ситиһиитинэн эҕэрдэлээн туран, салгыы куорсун анньынан өссө үрдүккэ көтөрүгэр баҕарыаххайыҥ!