Лааҕыр Чурапчытааҕы физкултуура уонна успуорт институтун иһинэн үлэлиэҕэ. Бу туһунан үлэ уонна социальнай сайдыы миниистирин солбуйааччы Иван Алексеев иһитиннэрэр.
“Үрүҥ көмүс өрөбүллэр” диэн аатаах аҕа саастаах дьоҥҥо анаммыт сайыҥҥы чэбдигирдэр лааҕыр Чурапчытааҕы физкултуура уонна успуорт институтун иһинэн арыллыаҕа. Маннык этиилээх институт бэйэтэ тахсыбыта. Икки симиэнэнэн үлэлиирин былаанныыбыт. Биир симиэнэ биир нэдиэлэ устата барыаҕа. Хамсык быһыытын толору ылбыт, 65 саастарыттан үөһэ саастаах 100 киһини сүүмэрдээн сырытыннарыахпытын баҕарабыт. Барыта этэҥҥэ буоллаҕына, лааҕыр от ыйын саҥатыгар арыллара күүтүллэр», - диэн тойон Алексеев тоһоҕолоото.
Лааҕырга сынньанааччыларга арааһынай викториналары, спортивнай күрэхтэри, уйулҕа тургутуктарын, иҥэмтэлээх ас туһунан лиэксийэлэри, маастар-кылаастары бэлэмнииллэр. «Толору интириэһинэй бырагыраамалаах буолуоҕа – күн ахсын сарсыардааҥҥы сэрээккэлэр, хаалыктаах хаамыы, национальнай успуорт көрүҥнэригэр дьарыктар буолуохтара. Күн-дьыл туран биэрдэҕинэ балыктатыахпыт, сир аһыгар таһаарыахпыт, айылҕаҕа таһааран дьаарбатыахпыт», - диир Иван Алексеев.
Миниистир солбуйааччыта бэлиэтээбитинэн, бырайыак эрэгийиэннээҕи «Бары бииргэ 55 +» аҕам саастаах дьон саастарын уһатыы бырагырааматын чэрчитинэн ыытыллыаҕа.
