Саха сиригэр, Дьокуускайга ааспыт нэдиэлэҕэ Охотскай муора диэкиттэн тахсыбыт хаһан да түспэтэх халыҥ хаар үллүктээтэ. Дьолго, хас да сыллааҕыта өрөспүүбүлүкэ илин өттүгэр сылгылар, массыына көстүбэт гына түспүт хаар хатыламмата. Ол да буоллар хас да ыйдаах нуорма икки хонукка тоҕо түспүт.
Бу хаар куорат саҥа талыллыбыт мээрэ Е.Григорьевка тургутук кэриэтэ буолла. Айылҕа уйанын-хатанын тургутан көрдө. Бассаабы баһылаабыт, быыбар кэмигэр устар ууну сомоҕолообут оппоненнара “көрөөрүҥ да истээриҥ, куорат хаарын кыайан ыраастаабакка, саакка-суукка барыаҕа” диэн сэтэрээһин бөҕө буолбуттара.
Ол эрээри эдэр мээр хамсатыылаах дьаһаллааҕын, хотуулаах үлэлээҕин көрдөрдө. Куорат суоллара, болуоссаттара, киһи сылдьар сирдэрэ бэрт түргэнник килэс гына оҕустулар. Элбэх тиэхиньикэни таһааран, тустаах тэрилтэлэри туруоран, тэрилтэлэри эбээһинэстээн, дьону субуотунньукка көҕүлээн, кырдьык, кытаанах тургутууну ааста.
Хаарынан улахан куораттарга хаһан да “оонньооботтор”. Санкт-Петербурга түспүт 2010 с. халыҥ хаары кыайбакка, В.И. Матвиенко дэлби саҥарыллыбыта, быыбарга талыллыа суоҕа диэн Москубаҕа көһөрбүттэрэ.
Билигин Новосибирскай куорат хаара кыайан хомуллубакка, биллэр хомуньуус мээр А.Локоть дуоһунаһыттан барар буолла диэн сонуннарга суруйаллар. Дойду үһүс улахан куоратын мээринэн хомуньуус А.Локоть 2014 с. салайан олорор, иккис болдьоҕор 2018 с. талыллыбыт. Быйыл элбэх хаар түспэтэр да, хаары хомуйуу кыһыны быһа кыайтарбатах. Онон эрэйэ суох мээриттэн Госдума дьокутаатынан барыаҕа, онтон ыла Новосибирскайга мээр быыбардаммат, сити-менеджер ананара буолуо диэн сабаҕалыыллар.
Инньэ гынан, айылҕа бу тургутуутун кэннэ, Дьокуускай хаары хомуйууга уопутун дойдуга тарҕатар кыахтааҕын көрдөрдө.
Сэҥээриилэр