Полиция үлэһиттэрэ дьуһуурустубалыы сылдьан, суол кытыытыгар портативнай гараж сытарын булан ылбыттар.
Куорат олохтооҕо ис сүрэҕиттэн махталын биллэрэр Арассыыйатааҕы ИДЬМ «Дьокуускайдааҕы» анал ППС батальонун үлэһиттэригэр полиция лейтенаныгар Антон Торговкиҥҥа уонна полиция ыстаарсай сержаныгар Архип Харитоновка, кини тус малын булан-харайан, дьаныардаахтык иччитин көрдөөн булан, бүүс-бүтүннүү илиитигэр тикисэрбиттэригэр.
Күнүс полицейскайдар Поярков уулусаатын эргин сулууспалыы сылдьаннар, олбуорга киириигэ, суол кытыытыгар иччитэ суох портативнай гараж тэлимнии сытарын бэлиэтии көрбүттэр. Портативнай гараж тыал күүстээх үрүүтүгэр ханнык эмит массыынаттан таах көтүөҕүн сөбүн сабаҕалаан көрөөт, эдэр дьон чугастыы дьиэҕэ киирэн, кыбартыыралары кэрийэн ыйыталаһан портативнай гараж иччитэ ким буолуон сөбүн көрдөөбүттэр. Гражданнары ыйытыы түмүгүнэн, кинилэр быһаарбыттар, сир-халлаан икки-ардыгар хаалбыт мал хаһаайына 55 саастаах эр киһи буоларын уонна этэҥҥэ автотиэни иччитигэр төннөрбүттэр. Соһуччу сүтэ сыспыт малларын төннөрбүт дьиэ кэргэн муҥура суох үөрбүттэр, сэргэх, үтүө санаалаах быраабы араҥачылыыр эйгэ үлэһиттэригэр ис сүрэхтэриттэн махтаммыттар, этэҥҥэ сылдьалларыгар баҕарбыттар.
-“Кыһыҥҥы кэмҥэ, портативнай гаражтар нэһилиэнньэ ортотугар олус ирдэнэллэр. Хомойуох иһин бу курдук автотиэннэр түөкүттэр харахтарын далыгар киирэннэр, сирэйэ-хараҕа суох уоруллан сүтэн хаалар түбэлтэлэрэ үгүс. Бу сырыыга, оннук да хайа баҕар буолуон сөбүн, сэргэх, болҕомтолоох ботуруул үлэһиттэрэ түбэһэ көрөннөр, дьиэ кэргэн элбэх харчыга атыыласпыт сыаналаах мала сүтэн-оһон хаалбатах”, - диэн иһитиннэрэр ИДЬМ пресс-сулууспата.