Мииринэйгэ Саха сиригэр сүүстэммит ынах этэ – дэҥҥэ көстөр күндү ас. Манна олохтоох, иҥэмтэлээх бэйэ оҥоруу аһа соччо кэлбэт даҕаны.Соҕурууттан тиэллэр эт астыннарбат, хаана да ычык-бычык, минэ төрүт барбат. Аны, ааһа баран, Австралия уонна Дания эттэрин маҕаһыыннар тылбыытыгар тиийэ кыстанан тураллар.
Кыстык кыһалҕалаах кэмигэр хараарҕаан олорор мииринэйдэри, Үөһээ-Бүлүүттэн «ИП Сортолова» атыылаах-тутуулаах кэлэн харахпытын сырдатта.Ыраах сиртэн кэлбит дьон үгүс бородууксуйаны аҕалбыттар: ынах этиттэн арҕас, амынньыар, баччах, тараһа, бөдүргэй, түөс көмүрүөтэ, эбиитин хаан, харта, фарш, арыы, лоһуор собо, уо.д.а.Бастакы күн аҥаарыгар киилэтэ 650 солкуобайдаах арыыны, хартаны, хааны, ынах этин бастыҥын, көрүөх бэтэрээ өттүгэр бүтэрэн кэбистилэр.
Мииринэйгэ олохтоох арыыбыт 800-1000 солк сыаналаах. Итинэн да буолуо, үөһээ-бүлүүлэр арыыларын уочаракка бастакы турбуттар былдьаһа-тарыһа ыллылар.Атыылааччылар “арыы бүттэ, хаан, харта эмиэ бүттүлэр” диэбиттэрин үрдүнэн, мииринэйдэр, баҕар туох эрэ тахсыа диэбиттии, субу-субу кэлэ турдулар.Лоһуор собо – Бүлүү күөллэрин гиэнэ. Сыаната – 232 солк. Биһиэхэ, Мииринэйгэ – 300 солк. Дьон куулунан атыыластылар.
Уопсайынан, үөһээ-бүлүүлэр, төһө да бытарҕан тымныы турдар , букатын ыраах сиртэн кэлэн атыылаабыттарын олус биһирээтим. Буолаары буолан, биир эрэ күн буолбакка, үс күн тилэри тэбэн туран тулуурдаахтык атыылаатылар.
Кытаатыҥ! Өссө да кэлэ тураарыҥ!
Станислав Алексеев. Мииринэй куората . Ааптар хаартыскалара.