Хоруона хамсыгын бохсор Саха сиринээҕи суһал штаб биллэрбитинэн, балаһыанньа Мииринэй улууһугар тыҥааһыннаах.
Тохсунньу 11 күнүттэн 26 күнүгэр, ол эбэтэр бүгүҥҥэ диэри, 318 киһи хоруона хамсыгынан ыарыйда. 15 күн устата! Ааспыт суукка устата – 34 киһи. Мииринэй оройуона Дьокуускай кэнниттэн иккис миэстэҕэ иһэр. Дьон мааската уонна бэрчээккэтэ суох сылдьалларын, антисептиктары туһамматтарын түмүгэр, Мииринэй куоратын олохтоохторо, бэйэ-бэйэлэрин хоруона хамсыгынан сол да сутуһа сылдьаллар.
Буолаары буолан, кинилэр элбэх эмчити, чуолаан МЦРБ поликлиникатын уонна балыыһатын үлэһиттэрин сутуйталаатылар. Үгүс эмчит ковиднай госпиталь реанимациятыгар киирдилэр.Соҕурууттан уоппускаларыттан кэлбит дьон ыалдьа сылдьалларын ааххайбаттар.
Дьон бастаан утаа тымныйбыт курдук, үрдүкү кыраадыстаах балыыһаҕа киирэллэр. Быраастарга ыарыһахтар быыстала суох хахсыйан сөтөллөбүт, итииргиибит-тоҥобут дииллэр.Бастакы диагноз – ОРВИ эбэтэр пневмония. Ол эбэтэр сэбиргэхтэтии.Инфекционист-эмчиттэр, бу дьон күөмэйдэриттэн уонна мурунннарын сарыыларыттан мазок ылан, олохтоох иммунологическай лабораторияҕа тургуппуттара хоруона хамсыга буолан хаалар. Ол анаалыһы Дьокуускайга доруобуйа харыстабылын министиэристибэтин иммунологическай лабораториятыгар бигэргэттэрэллэр.Сорох дьон ыарыыларын тулуйа-тулуйа өр сылдьан, тыҥаларын 40-50 бырыһыанын хамсыкка сиэтэн кэбиһэллэр. Компьютернай томограф (КТ) түмүгүттэн соһуйаллар.
Оттон тыҥаларын 70-75 бырыһыан сиэппит дьону, ыарахан ыарыһахтар сытар ковиднай отделениеларын реанимациятыгар ыыталлар, ИВЛ аппараатыгар тыҥаны искусственнай вентиляцияҕа холбууллар. Бу дьон олохторугар улахан куттал суоһуур. Дьарҕаа ыарыылаах, саахардара үрдүк, сүрэхтэрэ мөлтөх дьон өлөн да хаалыахтарын сөп. Бу дьон олохторун иһин эмчиттэр хайдах сатанарынан охсуһа сатыыллар. Төһөлөөх киһи реанимацияҕа өлөр-тиллэр икки ардыгар сыппыта буолуой?! Хомойуох иһин, реанимацияҕа сытан быстыбыт дьон чуолкай ахсаанын былаастар эппэттэр.
Станислав Алексеев. Мииринэй куората.
