«Ийэ тыл уонна сурук-бичик» декадатыгар сөп түбэһиннэрэн, «САХА» Национальнай көрдөрөр-иһитиннэрэр хампаанньа СА¢А КЭНСИЭПСИЙЭТЭ: төрөөбүт тылы харыстааһыҥҥа – тэлэбиидэнньэ уонна араадьыйа суолтата» диэн ааттаах Төгүрүк остуолу тэрийэ, саха тылын кэрэтин-уранын бэйэлэрин айымньыларыгар иҥэрбит биллиилээх суруйааччыларбыт, бөлүһүөктэрбит төрөөбүт-үөскээбит ытык сирдэригэр – Таатта улууһугар – илин эҥээр олохтоохторун кытта көрсүһэ, бар дьон санаатын истэ, сэһэргэһэ, олунньу 17 күнүгэр бара сырытта.

Төрөөбүт тылбытынан саҥарар, көрдөрөр соҕотох Национальнай хампаанньабыт сотору цифровой сибээскэ көһөр. Онон «Саха» НКИХ бастакы мультиплекска киирэр быраабы ылар куонкуруска киирсээри сылдьар.

Сахалыы өйдөөх-санаалаах, куттаах-сүрдээх ыччаты иитэн таһаарыыга төрөөбүт тылбытынан саҥарар, көрдөрөр хампаанньа төһүү оруолу ылара саарбаҕа суох. Ол туһунан СӨ Бэрэсидьиэнэ Е.Борисов  Төрөөбүт тыл уонна сурук-бичик күнүгэр аналлаах дакылаатыгар этэн аһарда, сахалыы тылынан интэриэһинэй биэриилэрдэ, мульт-киинэлэрдэ хото таһааран иһиҥ диэн ыҥырда.

Сэтинньи 7 күнүгэр биһиги хампаанньабытын бастакы мультиплекска регионнааҕы 9-с ханаал быһыытынан киллэрэргэ СӨ Бэрэсидьиэнэ Е.Борисов ыйааҕа тахсыбыта. Бу биһиэхэ өссө үрдүк эппиэтинэһи сүктэрэр. Билигин эфиргэ 16 чаас тахсар буоллубут. Эфири интэриэһинэй биэриилэринэн толорорго үлэлиибит. Бар дьоммут аҥаардас өрөспүүбүлүкэ эрэ олоҕунан муҥурдамматыннар диэн, урукку кэмҥэ аатыра сылдьыбыт киинэлэри эмиэ көрдөрөбүт. Арассыыйа уонна аан дойду тэлэбиидэнньэтин бородууксуйаларын бэйэбит биэриибитигэр таһаарарга «СТП-контент» диэн Москубатааҕы фирманы кытары үлэни саҕалаатыбыт. Улуустааҕы филиалларбыт эфиргэ тахсар кэмнэрин элбэттибит. Билигин кинилэр биэриилэрэ, киинэлэрэ Саха тэлэбиидэнньэтигэр күн ахсын көстөллөр. «Саха» НКИХ көмүс пуондатыттан дьон-сэргэ кутун-сүрүн туппут, киэҥ биһирэбили ылбыт урукку биэриилэри хатылыыр буоллубут. Онон хас биирдии көрөөччү, сааһыттан тутулуга суох, бэйэтигэр чугас, сөбүлүүр биэриилэрин көрөр кыахтанна.

Кэнэҕэһин түүннэри-күнүстэри тохтобула суох үлэлииргэ анаан, билигин кэлэктиип иннигэр өссө интэриэһинэй биэриилэри, сытыы репортажтары бэлэмниир сорук турар. Мин санаабар, кэлэктиип маныаха бэлэм.

Бу кэнсиэпсийэни дьүүллэһиигэ Саха сирин хас биирдии олохтооҕун ыҥырабыт. Үлэбит кэлэр 5-10 сыллаах сүрүн хайысхаларын ыйар сүрүн докумуоммут биһиги хампаанньабыт Интэриниэккэ саайтыгар – www.nvksakha.ru баар. Киирэн көрүҥ, ааҕыҥ, этиигитин киллэриҥ диэн ыҥырабыт. Кулун тутарга Бүлүү бөлөх улуустарыгар Төгүрүк остуол ыытыахпыт. Хампаанньабыт Уопсастыбаннай Сүбэтин чилиэннэрэ кыттыылаах аһаҕас эфирдэри оҥоруохпут. Кэпсэтиигэ баҕалаахтары барыларын күүтэбит.

Кулун тутар 29-30 күннэригэр аны Арассыыйа регионнарын теле-араадьыйа хампаанньалара, билим үлэһиттэрэ кыттыылаах билим-быраактыка кэмпириэнсийэтин тэрийиэхпит.

«Саха» НКИХ Бэрэсидьиэнэ

Иван АНДРОСОВ.