Дьокуускайга алта киһи биир бөлөххө түмсэн, урбаанньыттары 25 мөл. солкуобайга албыннаабыттар. Дьокуускай борокуратууратын пресс-сулууспата иһитиннэрэринэн, кинилэргэ түөкүннээһини оҥорууга холуобунай дьыала тэриллибит.
Бөрөстүүпүнньүктэр Дьокуускай куоракка атыы-эргиэн эйгэтигэр үлэлиир тэрилтэлэр ааттарын туһанан, юридическэй «сирэйдэммиттэр». Ол кэнниттэн, бу хара дьайдаахтар атын урбаанньыттары кытта бастаан кэлэр табаардары аҕалыыга дуогабардары түһэрсэ сылдьыбыттар. Оттон табаар кэлбитин кэнниттэн, төлөбүрдэрин ыыппатахтар. Түөкүннэр кэлбит табаары оптовай баазаларынан, ырыынактарынан уонна даҕаны атын тэрилтэлэринэн чэпчэки сыанаҕа атыылаабыттар. Мантан кэлбит дохуот улахан аҥаарын түөкүннэр бөлөхтөрүн салайааччылара ылбыт, оттон хаалбыт суумматын атыттар бэйэлэрин икки ардыларыгар үллэстибиттэр.
Буруйданааччылар бөлөхтөрүн тэрийбит киһи уопсай режимнээх холуонньаҕа 14 сылга бириигэбэрдэммит. Оттон сорохтору дьайыыларыттан көрөн, 5 сыл 11 ыйтан 8 сылга диэри көҥүллэрин быспыттар. Ол эрээри, билиҥҥитэ бу бириигэбэр сокуоннай күүһүгэр киирэ илик.