Бүгүн Хотугулуу-илиҥҥи федеральнай университет Культурнай киинигэр Амма улууһун Сулҕаччы орто оскуолатын физикаҕа уонна информатикаҕа учуутала Розалия Петровна Винокурова хартыыналарын быыстапката үөрүүлээхтик аһылынна.
Бэлиэ түгэҥҥэ талааннаах далбар хотуҥҥа Арассыыйа худуоһунньуктарын айар сойууһун чилиэнэ буолбутун туоһулуур дастабырыанньа туттардылар.
Кэлбит дьон самодеятельнай худуоһунньук үлэлэрэ дириҥ ис хоһоонноохторун, киһини долгутар тыыннаахтарын бэлиэтээтилэр.
Өр сыл оҕолору үөрэтэрин таһынан, эргиччи талааннаах: уруһуйдьут, хомоҕой тыллаах элбэх кэпсээн, сценка, хоһоон ааптара, үгүс литературнай күрэх кыайыылааҕа Розалия Винокурова хартыыналарын быыстапката муус устар 1 күнүгэр диэри туруоҕа.
