Олунньу ый бүтэһик нэдиэлэтигэр Мииринэйгэ үлэ буларга маннык чахчылары буллум.
Аллараа суруйбут сырдатыыбын олохтоох “Mирок-Биз” интернет-портаалтан туһанным. Өссө төгүл тоһоҕолоон бэлиэтиибин: өскөтүн идэтийии (квалификация, эрэсэрээт) суох буоллаҕына, бу диэки сананымаҥ даҕаны. Yлэ 99% - бырамыысаланнас идэлэрэ.
«АЛРОСА» МНГОК «Интернациональнай» руднигар үрдүкү хамнастаах шахтер икки бакаансыйата таҕыста. Бастакыта – шахта электровоһун машиниһа (төрдүс эрэсэрээт), иккиһэ – шахта самоходнай массыынатын машиниһа (төрдүс эрэсэрээт). Бу – бастайааннай буолбакка, сүрүн үлэһит уоппускаҕа сылдьар кэмигэр солбуйуу үлэтэ.
Тоҕо оччоҕо суруйдуҥ диэххит? «Интергэ» быстах, солбуйар үлэҕэ киирэн баран, бастайааннай үлэҕэ хаалбыттар элбэхтэр. Олор олус табыллан үлэлии сылдьаллар. Манна барыта бэйэҕитин хайдах көрдөрөргүтүттэн тутулуктаах.
Баҕар, «разнорабочайынан» ылыахтара, тыыппалааххытын көрдөхтөрүнэ, бэйэлэрин суоттарыгар, хамнаскытын хаалларан туран, УКК-ҕа үөрэттэриэхтэрэ.
Ол да бэрт дии! Шахтердар хамнастара олус үчүгэй. Бу үлэлэргэ киирии, Арассыыйа Үлэтин Кодексын чэрчитинэн, булгуччу толору социальнай бакыаттаах буолар.
Мииринэй уонна Ньурба ХБКларын холбооһунтан үөскээбит Мииринэйдээҕи-Ньурбатааҕы хайаны байытар кэмбинээт (МНГОК) куруусчуктары, дьиэни хомуйааччылары ыҥырар буолла. Үлэни тосхотооччулартан ыйыталаһаары, суотабайынан эрийдэххэ арааран кэбиһэр идэлээхтэр. Ону учуоттааҥ. Бу аата, Накыыҥҥа идэтийиитэ суох үлэһиттэри көрдүүллэр.
Энэргиэтикэ салаатыгар үлэ миэстэтэ куруук баар. «Якутскэнерго» самалыгар – ЗЭСкэ электросилиэсэр, тэрилтэ дьиэлэрин өрөмүөннүүр, көрөр-истэр оробуочай ирдэнэллэр.
Уопсайынан да, Мииринэйгэ, автокыраан машинистара, монтажниктар, электриктэр, «ДОПОГ», «Е», «С» бырааптаах суоппардар, гааска сыhыаннаах силиэсэрдэр куруук ирдэнэллэр.
Салгыы барабыт. «АЛРОСА» КСК-гар дьиэ сууйааччы, бассыайыҥҥа медсиэстэрэ (уоппуска кэмигэр солбуйуу) ирдэнэллэр. Эмиэ, быстах үлэҕэ киирэн баран, бастайааннай үлэҕэ киириэххэ сөп.
«Алмаздотранс» МАТП тэрилтэтигэр «Е» категориялаах ыраах айаҥҥа сылдьар суоппардары ыҥыраллар.
«Алмазавтоматика» трескэ сибээс лиинньийэтин уонна радиофикация 6-с эрэсэрээттээх электромонтерун көрдүүллэр.
«Интернациональнай» рудникка былырыын үлэҕэ киирбит газопоршневой электростанцияҕа ГПЭС маастара, ДВС машиниһа ирдэнэллэр.
Мин бу ыстаансыйа маҥнай тэриллэригэр, ботуччу хамнастаах үлэ тахсан эрэр, хамнаныҥ диэн суруйбутум. Үөһэ ааттаммыт бакаансыйалар Мииринэй куоратыгар уонна Накыыҥҥа бааллар. Дьэ биир сытыы боппуруос күөдьүйэр – олорор дьиэ.
Ити туһунан аныгыскы сырыыларга кэпсэтиэхпит.
Станислав Алексеев. Мииринэй куората.
