Аҕыс төгүл ковидтан быһыы (вакцина) ылбыт В.В. Жириновскай “омикроннаан”, ыарахан туруктаах балыыһаҕа киирбитэ дойдуну букатын дөйүттэ. Владимир Вольфович “ковидтан быһыы эрэ быыһыаҕа” диэн саамай актыыбынай аҕытаассыйалааччы этэ.
Оҕонньор ол-бу буоллаҕына, дьэ, иэдээн бөҕө буолар. Арассыыйа доруобуйатын харыстабылын аны ким да итэҕэйбэт буолар. Аанньа буолуо дуо? Икки сылы мэлдьи дойду 145 мөл. гражданнарын туһата суох, баҕар, буортулаах да вакцинанан хадаҕалыы сылдьыбыттарын ким үчүгэй диэҕэй? Долгуйбут, абарбыт дьон, өссө, дойду салалтатын аан дойду баайдара дьону аҕыйатар “кистэлэҥ саагыбардарыгар” кыттыбыккыт да диэн буруйдаан турдахтарына көҥүл.
“Бээрэ, ити хайдах хайдаҕый” диэн кэтэхпитин тарбанан баран, сахалыы аргыый наллаан Владимир Вольфович тоҕо итиччэ элбэх быһыыны уонна ханныгы ылбытын ырытан көрүөххэ.
Жириновскай 2021 с. алтынньы 26 күнүгэр ura.ru ааҕыныстыбаҕа (t.me/news/30952) балтараа эрэ сыл устата ковидтан алта уонна кирииптэн биир, барыта сэттэ быһыы ылбытын кэпсээбит. Бастаан, икки “Спутнигы”, онтон бэрэбиэркэлэтэн баран, антителалара аҕыйаабыттарын көрөн, үсүһүн “Спутник-лайт” ылбыт. Ол кэннэ тоҕо эбитэ буолла, вакцинатын уларытарга быһаарбыт. Антителалара аҕыйаатахтарын аайы, субуруччу барыта үс “ЭпиВакКоронаны” укуоллаппыт. Ол быыһыгар кириип быһыытын ылбыт. 2021 с. ахсынньы 15 күнүгэр билигин муодунай, номнуо улахан дэписиит буолбут Чумаков аатынан киин «КовиВак» вакцинатын ылбытын туһунан бэйэтин “Телеграмыгар” суруйбут.
Кини бу кылгас кэмҥэ аҕыс араас быһыыны ылбыта доруобуйатыгар улахан ноҕоруускалааҕын өйдүүр эбит да, маннык охсуо дии санаабатаҕа чахчы.
Көрөргүт курдук, кини антителалара аҕыйаатылар да, “иммунитеппын күүһүрдүөм” диэн саҥаттан саҥа быһыыны ылан испит. Кини хаана саахардаах эбит. Онтон дьиксинэн, быһыы ылан, антителаларын элбэтэн көмүскэниэм дии санаабыт буолуон эмиэ сөп. Ол быыһыгар, ханнык вакцина элбэх антителалары оҥорор диэн барыларын боруобалаатаҕа диэн сэрэйиэххэ сөп.
Жириновскай доруобуйатыгар үстэ субуруччу ылбыт “ЭпиВакКороната” улаханнык охсубут быһыылаах. Соторутааҕыта, “ЭпиВакКоронаны” туһата суох, сымыйа вакцина эбит диэн дойду үрдүнэн боппуттара. Өссө баҕар туох эрэ буортулааҕа даҕаны буолуо. Оттон, саҥа “Ковивак” төһө туһалааҕын эмиэ ким да билбэт.
Ол аата, Жириновскай үс “Спутник” быһыытын кэннэ, туһата суох быһыыларын аахсыбатахха, сылтан ордук кэм устата вакциналаммакка сылдьыбыт буолан тахсар.
“Омикрон” доруобуйаҕа охсуута кыра диэн, букатын ытырдар эрэ тумуутугар холуох курдук буолан эрэбит. Ол эрээри, син-биир ковид көрүҥэ буолан, мөлтөөбүт иммунитеттаах, хааннара үрдүк саахардаах дьоҥҥо куттала улахан эбит.
Жириновскай “омикронунан” ыалдьан баран, икки нэдиэлэ бырааска барбакка, кистии сылдьыбыта ордук охсубут. Ол түмүгэр, балыыһаҕа киирэригэр вирус тыҥатын 50-75% сиэбит.
Онон, Жириновскай 8 быһыыны ылбыта абыраабатах, ол аата, вакцина барыта туһата суох эбит диэн быһыыттан аккаастанарга төрүөт суох. Кини эспэримиэннээбэккэ, биир “Спутнигы” тутуһа сылдьыбыта буоллар, ыарыыга хаптарбакка сылдьыан сөп эбитэ буолуо. Билигин этигэр-сиинигэр ити үлүгэр элбэх вакцина хааһыламмытын кэннэ, ыалдьыбыт биричиинэтин чуолкай быһаарар уустук. Официальнай быһаарыы тахсара буолуо, онуоха диэри ол-бу сураҕы итэҕэйимэҥ. Доруобуйаҕытын харыстана сылдьыҥ.
Владимир Степанов.
