"КЫЫМ" ТОХСУННЬУ 27 КҮНҮНЭЭҔИ НҮӨМЭРИГЭР :
ӨРКӨН ӨЙДӨӨХТӨРБҮТ ТЫЛЛАРА-ӨСТӨРӨ
Юрист Макар Яковлев “Алмаас былдьаһыытын туһунан” ааҕан баран тус көрүүтэ ураты, этэрэ элбэх буолан биэрдэ. Историк Иван Николаев саха интеллигенциятын устуоруйатын үөрэтиини анаарда.
Баай тыллаах-өстөөх, дириҥ билиилээх, киэҥ көрүүлээх кырдьаҕастар суруйууларын аахпыт киһи өйүгэр өй, күүһүгэр күүс эбиллэрэ саарбахтаммат.
МСУ РЕФОРМАТА ДЬОҤҤО ТӨҺӨ ОХСУУЛААХ БУОЛУОЙ?
Суруналыыс Нина Герасимова баһылыктары кытта ОБС (Олохтоох бэйэни салайыныы) саҥа сокуонун тула кэпсэтиини салгыы ыытар. Ааспыт нүөмэргэ Таатта улууһун Дьохсоҕон нэһилиэгин баһылыга Петр Захаров, Уус Алдан улууһун Өспөх нэһилиэгин баһылыга Лена Свешникова санааларын билиһиннэрбитэ. Оттон бу нүөмэргэ суруналыыс Арассыыйа аптарыттыаттаах бэлиитиктэрэ, дьокутааттара, социологтара туох санаалаахтарын уонна атын регионнарга хайа балаһыанньа бүрүүкээбитин суруйда.
УСПУОРТ ЭЙГЭТИГЭР ОЛОХ КҮӨСТҮҮ ОРГУЙАР
Ааспыт субуотаҕа (тохсунньу 22 күнүгэр) Өймөкөөҥҥө үһүс төгүлүн экстрим-күрэхтэһии тэрилиннэ. Ити бэрт интэриэһинэй күрэхтэһии туһунан успуорт суруналыыһа, фотограф, өрөспүүбүлүкэҕэ киэҥник биллэр уопсастыбанньык Владислав Коротов кэпсиир.
Тохсунньу 27 күнүттэн Красноярскай куоракка көҥүл тустууга “Иван Ярыгин” аан дойдутааҕы Гран-при турнир саҕаланар. Саха сирин сүүмэрдэммит хамаандатын састаабыгар кимнээх киирдилэр? Ол туһунан суруналыыс Федор Рахлеев билиһиннэрэр.
ДУГУЙДААННААХ МИЧИЛ ЛОНДОҤҤА ХАҺАН ТИИЙЭЛЛЭР?
Саха сылгытын аар-саарга аатырдар тулхадыйбат, дьоһун соругу туруорунан, Дугуйдаан Винокуров уонна Мичил Неустроев былырыын кулун тутарга Өймөкөөн Үчүгэй сэлиэнньэтиттэн Лондон туһаайыытынан алгыстаах айаҥҥа туруммуттара. “Дьоммут ханна тиийдилэр?”, “айаннара-сырыылара хайдах баран иһэр?” диэн ыйытааччы үгүс. Суруналыыс ТатьянаЗахарова-Лоһуура айанньыттарга эрийэн сиһилии сэһэргэстэ.
ХАЛБАРЫЙБАТ ХАМСЫК АЙДААНЫН УҔАРЫТАН
Суруналыыс Нина Герасимова дойдуну бүтүннүү сутуйан эрэр саҥа «Омикрон» штамм туох муостаах-туйахтаах ыарыы буоларын сиһилии суруйда. Ону сэргэ кини бу сыстыганнаах ыарыыны сэрэтии уонна эмтээһин тула Өрөспүүбүлүкэтээҕи 3 №-ээх килииньикэлии балыыһа гериатрия импиэксийэҕэ 1-кы салаатын сэбиэдиссэйэ, кардиолог, гериатр-быраас Майя Мазинаны, ыксаллаах быһыыга-майгыга үлэ хайдах барарын туһунан Дьокуускайдааҕы 3№-дээх поликлиника сэбиэдиссэйэ, СӨ Доруобуйа харыстабылын уопсастыбаннай палаататын салайааччы Светлана Давыдованы кытта кэпсэттэ.
ААҔЫЫ СЫЛЫГАР ААҔАР ЫЧЧАТ ЭЛБИЭ ДУО?
Олохпут сайдан истэҕин аайы, сыыппара үйэтэ кинигэни, хаһыаты ааҕыыны үтэйэн эрэр. Ол да иһин ыччат ортотугар ааҕыыны көҕүлүүр инниттэн бу сыл үөрэх эйгэтигэр Ааҕыы сылынан биллэриллибитэ. Суруналыыс Туйаара Сиккиэр улуустарга олорор ыччат төһө ааҕарын билистэ.
САХА УСТУОРУЙАТЫН УЧУОБУННЬУГА ХАҺАН КЫРДЬЫГЫ ҮӨРЭТЭР?
Соторутааҕыта Сахабыт сирин устуоруйатын кэрэһилиир 3 туомнаах кинигэ тахсыбыта. Маны сэргэ, устуоруктар, кыраайы үөрэтээччилэр түмсэн, дойдубут кырдьыктаах устуоруйатын чопчулаһан кэпсэттилэр, сүбэлэстилэр. Устуорук идэлээх Вильям Яковлев дойдубут устуоруйата оскуолаҕа үөрэтэр кинигэлэргэ, олохпут будулҕаныгар муммут өрүттэрин туһунан санаатын эттэ.
АЛЕКСАНДР ДМИТРИЕВ-ЧҮМЭЧИ 65 СААҺЫГАР КӨРСӨ
Норуот уоһуттан түспэт ырыалары айбыт, уустук дьылҕалаах чаҕылхай мелодиска Александр Дмитриевка-Чүмэчигэ анаммыт эксклюзивнай матырыйаалы суруналыыс Оксана Жиркова бэлэмнээтэ. Кини Чүмэчи игирэтин аҥаара Светлана Интерновнаны, кыыһа Марфа Егорованы, оҕо сааһын доҕоро Николай Ушницкайы, айар суолун аргыстара Сардаана Осипованы, Сиэн Өкөрү, Дмитрий Санниковы кытта кэпсэттэ.
САХАЛЫЫ ТЫННАММЫТ «КАСАБЛАНКАНЫ» ТОЛОРОР КЫЫС КИМИЙ?
Саҥа дьыл эрэ иннинэ араадьыйаҕа Айгылаан тылыгар, Вероника Степанова толоруутугар “Casablanca” сахалыы тылынан тахсыбытын сэргии истибиппит. Долгун нөҥүө сүрэхтэммит ырыа истээччигэ сөбүлэтэн, билигин хит буолла. Бу ырыа хайдах сахалыы тыыннаммытын туһунан ырыа тылын айбыт Айгылааны уонна ырыаһыт Вероника Степанованы кытта суруналыыс Айаана Ларионова кэпсэттэ.
БЫЛЫРГЫ ҮГЭҺИ АНЫГЫ ҮӨРЭҔИ КЫТТА ДЬҮӨРЭЛИИР ЭМЧИТ БААР ЭБИТ
Анисья Старостина-Сайыы Кута диэн арчыһыт, эмчит, нумеролог айылҕаттан бэриһиннэрбит дьоҕурун сэргэ аныгы үөрэҕи дьүөрэлии тутан ыарыһаҕы эмтиир, кыһалҕалаахха көмөлөһөр, айгыраабыты чөлүгэр түһэрэр эбит. Кини дьикти-дьиибэ ньыматын суруналыыс Туйаара Сиккиэр ыйыталаста.
КЫҺЫҤҤЫ НУУРАЛ КИЭҺЭҔЭ ӨССӨ ТУГУ ААҔАБЫТ?
Суруналыыс Афанасий Гуринов-Арчылан бэлэмниир түөрт балаһалаах сыһыарыытын кэтэспит киһи элбэҕин сэрэйэбит. Кыһыҥҥы киэһэлэргэ сууланан олорон астына-дуоһуйа ааҕарга кэпсээн эгэлгэтэ, айымньы мааныта, хоһоон хомоҕойо манна баар буоллаҕа.
СААРБАХ БАССААПТАН АРАХ, КЫРДЬЫКСЫТ "КЫЫМЫ" ААХ!
