Мииринэйгэ ас-табаар кэлиитэ мөлтөх. Суолбут-ииспит ситэтэ суоҕуттан, “тиийбэт тирии, таппат тараһа” курдук буолан хаалааччы. Атын сирдэртэн соторутааҕыта көһөн кэлбит дьон сыанабыт ыараханыттан эрэ буолбакка, мөкү хааччыстыбатыттан эмиэ өмүтүннэрэ бэрдэрэллэр. Оттон биһиги – олохтоохтор үөрэнэн хаалбыппыт. Тугу куду анньалларын былдьаһа-тарыһа ылан эрэ иһэбит.
Сайын Өлүөнэ өрүһүнэн бородуукта ситэ-хото тиэллибэт. Сөмөлүөтүнэн кэлэр ас-табаар сыаната ыарахана биллэр. Кыhын, ындыылара, Усть-Куттан Верхнемарковонан Мииринэйгэ (1.140 биэрэстэ) улахан фургоннарга тоҕус сорунан тиэллэн кэлэр. Көлөттүгэс фуралар үрэхтэр ууларын араарар систэригэр, тамахтарыгар, мырааннарга, алыыларга халтарыйаллар, сууллаллар. Бу айан суола – кыһыҥҥы эрэ.
Муус устар ый саҥатыттан ахсынньы ый бүтэһигэр диэри сабыллан турааччы. Абыраллаах айан суолбутун 2021 сыл ахсынньы 20 күнүгэр астылар. Быйыл, туох баар тиэллэр ас-үөл «бас быстар» ыарахан сыаналаах.
Ортотунан ыллахха, Мииринэй маҕаһыыннарыгар бүгүҥҥү сыаналар манныктар: саахар киилэтэ – 90, гречка – 95-110, ириис куруппата – 95-125, килиэп – 50-60, ынах арыыта – 800, лиитэрэ мас арыыта – 160-200, сымнаҕас сыыр – 700, мокоруон(«Алейка») - 60, маанка куруппата – 50, ынах этэ - 600, бараан этэ – 700 , сибиинньэ этэ – 700, уон устуука сымыыт – 93-97, тууhаммыт форель – 1.400 солк(1 киилэ), хортуоппуй – 80-90, хаппыыста 80-90, моркуоп-90, виноград -300-600, груша – 350-380, дьаабылыка – 180-230, «Активиа» бифидум-йогурт(125 грамм) – 65-78 солк сыаналаахтар.
Урут, Белоруссиятттан кэлэр 82 бырыһыан сыалаах ынах арыыта 600 солкуобайдаах этэ (биир киилэ). Үүммүт сылга – 800 солк. Хомойуох иһин, Мииринэйгэ тиэллэр бородууксуйа, сорох түбэлтэлэргэ болдьоҕун ааһан баран кэлэр. Оннук бородууксуйаны атыылаччылары ситэ уодьуганныы иликтэр. Ити курдук, бас баттах барбыт сыаналаах сиргэ олоробут. Олохтоох бородууксуйаны аҕаллахтарына эмиэ оннук. Улуустартан атыылыы кэлбит дьон, дойдуларыгар бараары ыксаан, астарын кууһунан удамыр сыанаҕа Мииринэй урбаанньыттарыгар батаран кэбиһэллэр. Онтуларыҥ үрүҥ балык да буоллун, собо да буоллун, сыанатын сөҕүмэрдик ыараталлар.
Бэл, биир киилэ салгылаабыт собону 350 cолкуобайга атыылыллар. Биир киилэ тууччах – 1.600 солк. Биир киилэ чыыр – 1.200 солк! Хайыаҥ баарай? Атыылаһаргар эрэ тиийэҕин.
Станислав Алексеев. Мииринэй куората. Ааптар хаартыската
