Харыйа уота сандаарыа

Аҕа баһылык уонна эрэгийиэннээҕи бырабыытылыстыба пресс-сулууспата иһитиннэрэринэн, ахсынньы 1 күнүгэр, «Кыһын Саха сириттэн саҕаланар» бэстибээл чэрчитинэн, Дьокуускай Ленин болуоссатыгар Арассыыйаҕа маҥнайгынан Саҥа Дьыллааҕы харыйа уоттарын уматыахтара. Харыйа уоттарын уматыы киэһэ 16 чаастан саҕаланыаҕа, манна саха сиринээҕи тымныы баһылыга Чысхаан кыттыыны ылыаҕа. Кини уонна Саха сирин Аҕа баһылыга Айсен Николаев Үйэлээх тымныы саарыстыбатыттан быһа биэриигэ холбонуохтара. Ону таһынан, быһа биэриигэ өрөспүүбүлүкэ араас муннуктарыттан дьон-сэргэ кыттыа.

Ил Дархан чорботон туран эттэ: «Үгүс сылларга олохтоммут үтүө үгэһинэн, биһиги сахалар, Дьокуускай куоракка бастакынан Саҥа Дьыллааҕы харыйа уоттарын уматыахпыт уонна бүтүн Арассыыйаҕа эстэпиэтэни туттарыахпыт. Бу күн тымныы баһылыга Чысхаан кырдьаҕас күн-дьыл эргиирин алҕыа уонна чэбдик илгэлээх салгыны дойду устун ыытыаҕа». Хамсыгынан сибээстээн былаастар маассабай, култуурунай тэрээһинтэн аккаастаннылар. Ол оннугар, куорат олохтоохторо бу күн бырааһынньыктааҕы фейерверк ытыытын көрүөхтэрэ. Саха сирин уонна Арассыыйа атын эрэгийиэннэрин олохтоохторо бу эриэккэс тэрээһини «Саха» НКИХ уонна “Якутия 24” тэлэбиидэнньийэ ханаалларыгар уонна социальнай ситимнэргэ көрүөхтэрин сөп. Тэлэбиисэринэн бу дьайыы 15.30 чаастан саҕаланыаҕа. Көрөөччүлэргэ Тымныы оҕуһун туһунан остуоруйаны көрдөрүөхтэрэ уонна Великай Устюгтан Дед Мороз бэйэтин эҕэрдэтин тиэрдиэҕэ. Оруобуна 16 чааска камералар харыйа уоттарын уматыы үөрүүлээх түгэнин көрдөрүөхтэрэ. Ону таһынан, өссө биир саҥа дьыллааҕы харыйа Орджоникидзе аатынан болуоссакка сандаарыа.