КОВИД-19 утары охсуһар Өрөспүүбүлүкэтээҕи суһал ыстаап биллэрбит чахчыларынан сирдэтиннэххэ, Мииринэй оройуонугар балаһыанньа бөрүкүтэ суох.
Ааспыт уон күн устата, 197 киһи хоруона хамсыгар ылларбыта бигэргэтилиннэ. Ковид госпиталыгар ыарыһах үксүү турар.
«АЛРОСА» оперативнай штаба биллэрбититтэн түмүктээтэххэ, ортотунан 120-130 киһи госпитальга бааллар. Бэҕэһээҥҥи туругунан 406 киһи амбулаторнай быһыынан эмтэнэр. Мииринэй оройуонун үрдүнэн, балаһыанньа сытыырхайын нэһилиэнньэ дьэ өйдөөн-дьүүллээн эрэр. Улахан дьон поликлинатыгар вакцина ылаары ойоҕос тостор, этиһиилээх, мааттаах-мууттаах уочарат бөҕөтө. ПЦР-анаалыстары ылыыга анаан икки кэбиниэт үлэлиир. Онно эмиэ уочарат. Эмчиттэр ноҕоруускалара сүрдээх улахан.
Анаалыстары, Өрөспүүбүлүкэтээҕи Доруобуйа харыстабылын министиэристибэтин иммунологическай лабораториятыгар чопчулаталлар. Дьон олохторун иһин, эмчиттэр, хайдах сатанарынан киирсэ сатыыллар. Мииринэйгэ, хоруона хамсыга туруоҕуттан ылата суох буолбут киһи ахсаана 200-тэн тахса буолбут. Бу – элбэх.
Хатылаан этэбин, Мииринэй балыыһатын эмчиттэрэ, олус диэн илиһиннилэр. Поликлиника өрөбүл күннэргэ кытары, сарсыарда аҕыстан киэһэ аҕыска-тоҕуска диэри үлэлиир. Балаһыанньа арыый да көнүөн Мииринэй оройуона – кэлии-барыы дойдута. Ахсынньы 15 күнүгэр Усть-Куттуур айан суола арылыннаҕына Иркутскай уобаластан дьэ араас дьон кэлиэхтэрэ турдаҕа. Кинилэри ким бэрэбиэркэлээбитэ баарай.
