СӨ Үлэ Министиэристибэтэ иһитиннэрэринэн, «Сыл дьиэ кэргэнэ - 2021» бэстибээл түмүгүнэн, Өлөөн эбэҥки национальнай оройуонун Харыйалаах сэлиэнньэтиттэн Семеновтар дьиэ кэргэн бастыҥ көс олохтоох ыалынан ааттанылар.
«Роман уонна Вероника Семеновтар – табаһыттар утумнааччылара. Кинилэр өбүгэлэрэ дьиэ кэргэннэрин илдьэ туундара устун көһө сылдьаллара, итинник гынан сиэннэригэр төрөөбүт дойдуларыгар тапталы иҥэрбиттэрэ. Кинилэр билигин эдэр табаһыттарга холобур буолаллар», - диэн иһитиннэриигэ суруллар.
Семеновтар дьиэ кэргэн 2019 сыллаахтан оҕолорун илдьэ туундара устун табаһыттары кытта көс олоҕунан олороллор. Кыра эрдэхтэриттэн табаһыт үлэтэ хайдаҕын-тугун барытын билэллэр, биэс саастаах уолларын уонна үс саастаах кыыстарын үөрэтэллэр.
Роман уонна Вероника сыл ахсын «Табаһыт күнэ» диэн үгэс буолбут бырааһынньыкка көхтөөхтүк кытталлар. Бу сылга Роман 10 килэмиэтиргэ сыарҕалаах табалары сүүрдүүгэ кыайыылааҕынан тахсыбыта.
«Саха сирин көс олохтоох дьиэ кэргэнэ-2021» анал аакка төрүт үгэстээх уонна өбүгэлэрин үгэстэрин илдьэ сылдьар, балыгынан, булдунан дьарыктанааччы, сир аһын хомуйааччы уонна табаһыт дьиэ кэргэннэр кыттыыны ылбыттара. Манна көс олохтоох ыаллар төрүт таҥаһы тигиини, өбүгэ саҕаттан кэлбит туттар сэби-сэбиргэли туттууну, түүлээх таҥаһы тигиини көрдөрбүттэрэ.
Куонкурус түмүгүнэн, бу анал аакка бастакы миэстэни Өлөөнтөн Вероника уонна Роман Семеновтар дьиэ кэргэннэрэ ыллылар, иккис миэстэҕэ Томпоттон Анастасия уонна Афанасий Абрамовтар тигистилэр, үһүс миэстэ Анастасия уонна Григорий Кривошапкиннарга ананна.
«Сыл дьиэ кэргэнэ - 2021» өрөспүүбүлүкэтээҕи күрэх быйыл 20-с төгүлүн ыытылынна уонна кэтэхтэн буолла. Маннык анал ааттарга кыайыылаахтары быһаардылар: «Көс олохтоох дьиэ кэргэн», «Тыа дьиэ кэргэнэ», «Дьиэ кэргэн – үгэһи харайааччы», «Эдэр дьиэ кэргэн», «Элбэх оҕолоох дьиэ кэргэн». Куонкуруска 23 муниципальнай тэриллииттэн 63 ыал кыттыыны ылла.
СӨ Үлэ Министиэристибэтин пресс-сулууспатын хаартыскалара.
