Бүгүн сэтинньи 17 күнүгэр Саха сирин аҕа баһылыга Айсен Николаев уонна Дьокуускай куорат мээрэ Евгений Григорьев суруналыыстары кытта, саҥа өрөмүөннэнэн бүппүт, кэҥэтиллибит Окружной шоссе устун айаннаатылар, үлэ хайдах ааспытын көрдүлэр, сыаналаатылар. Бу күнтэн ылата бу суолунан массыына сырыыта арылынна.
Айсен Николаев эттэ: «Бүгүн Дьокуускай куоракка кэрэ-бэлиэ күн. Үгүс сыл тухары Туймаада хочотун дьоно-сэргэтэ бу суол оҥоһулларын, кэҥиирин кэтэспитэ. Билигин бу суол туох баар ирдэбиллэргэ эппиэттиир куорат биир хорук тымыра. Мантан инньэ улахан уйуктаах массыыналар куораты Окружной шоссенан эргийэр буолуохтара, онон куорат уулуссаларыгар ноҕуруускалара лаппа аччыаҕа», - диэн тоһоҕолоон туран бэлиэтээтэ өрөспүүбүлүкэ аҕа баһылыга.
Куорат мээрэ Евгений Григорьев бэлиэтииринэн: “Окружной Шоссе атын суоллартан ураты. 4,2 км усталаах суол – түөрт балаһалаах. Кэтит иэннээх. Сорох сирдэринэн кэтитэ 16,7 – 23,5 м. тиийэ. Ону тэҥэ суолу кыйа тротурадар итиэннэ билэсипиэт суоллара оҥоһуллубуттара. Пассажирдарга уонна сатыы дьоҥҥо куттал суоһаабатын туһугар – суол устун тимир хааччахтар турдулар. Суол олус хаачыстыбалаахтык оҥоһулунна. Мантан кыһын биһиги суол туругун кэтээн көрүөхпут, туох эмит алдьаныы-кээһэнии таҕыстаҕына оҥорбут тэрилтэ гарантиялыыр эбээһинэһин усчуотугар ону барытын көннөрүөҕэ”
2020 сыллаахха «Дорстрой ХЭТ-ы кыттар муниципальнай дуогабар түһэрсиллибитэ».
СӨ АГиП пресс-сулууспата
