Саха Өрөспүүбүлүкэтин бодибилдингын федерацията, Change.org диэн социальнай ситимҥэ, Саха сирин былаастара үлэлээбэт күннэргэ успуорт кииннэрэ сабыллалларын туһунан уураах таһаарбыттарын көтүрэллэригэр петиция анаан таһаарда. Билиҥҥи кэм туругунан петицияны 850 киһи илии баттаата.
Петиция ааптардара абараллара оруннаах. Тоҕо диэтэххэ хамсыгынан сибээстээн биллэриллибит үлэлээбэт күннэргэ – алтынньы 30 күнүттэн сэтинньи 7 күнүгэр диэри спортивнай кииннэр сабыллаллар, оттон арыгы маҕаһыыннара – үлэлиллэр!
“Бу петиция-суругунан биһиги, киһи успуордунан дьарыктанар бырааба кэрээнэ суох кэһиллэрин туһунан биллэрэбит! Оччотугар буоллаҕына, арыгы иһэ-иһэ күүлэй тэппит ордук курдук буолан тахсар дуо, чөл олоҕу тутуһан успуордунан дьарыктаммыттааҕар!? Дьон-сэргэ кафеларга, эрэстэрээннэргэ мустан аһыы утаҕы ыймахтыан сөп, оттон успордунан дьарыктаныы оннооҕор хааччахтары да тутуһан туран – көҥүллэммэт!” – диэн успуорт сүгүрүйээччилэрэ абаран-сатаран туран суруйдулар.
Петиция ааптардара бэлиэтииллэринэн фитнесс-индустрия салаата букатын эстии суолга турда. “Аччыгый биисинэһи маннык күчүмэҕэй кэмҥэ өйүүргэ хантан эрэ эбии харчы көрүллүөн наада, саатар олох-дьаһах төлөбүрдэрин, успуорт саалаларын арендатын төлөһөргө ханнык эмит субсидия оҕото....”
Сурук түмүгүн успуорт уопсастыбата маннык курдук күүстээх тылларынан ытаһалаан биэрдэ:
-Киһи этин-хаанын чэбдигирдиитэ, эрчиллиитэ – бу ханнык баҕар ыарыыны кыайар, сэрэтэр төһүү күүс.
Ол эрээри, хомойуох иһин, бэлиэтиэҕи баҕарыллар --бу петиция Эмиэрикэ Change.org социальнай ситимигэр тахсан, Арассыыйа Федерациятыгар дьайар туох да юридическай күүһэ суох. Судаарыстыбаннай былаас уорганнара маныаха эппиэттиир, дьаһал биэрэр эбээһинэстэрэ эмиэ сокуонунан көрүллүбэтэх.
