“Саха” НКИХ биэриилэрин икки арда биэстии мүнүүтэ буола-буола кыбытыллар рекламанан туолла. Муҥ саатар, үлэҕэ дуу, туох эрэ кэскиллээххэ дуу ыҥырар биир да биллэрии суоҕун кэриэтэ, барыта ырыа-тойук, кэнсиэр, бырааһынньык, шоу. Аҕыйахтыы мүнүүтэ буола-буола барыта эргийэн кэлэ турар. Ити курдук, суукка устата эргийэр рекламаҕа ол кэнсиэрдэригэр кыттыахтаах артыыстары барыларын салгыахтарыгар диэри көрөн баран, дьон-сэргэ кэнсиэргэ барбата да буолуо дии саныыбын. Олус элбэхтик хатыланыы, дьону сылатыы, ньиэрбэҕэ оонньооһун, төттөрүтүн, дьону тэйитэр айылгылаах.

Киин тэлэбиидэнньэ ханааллара эмиэ үүт-үкчү оннуктар. Барыларыгар биир реклама киирэн эргийэ сылдьарыттан сылыктаатахха, реклама да биэрээччи аҕыйах быһыылаах. Онон, тэлэбиидэнньэ үлэһиттэрэ үлэлиир чаастарын аҕыйатаары ити курдук рекламанан үлүһүйэр буолуохтарын сөп. Били, “сүгэ түһүөр диэри дүлүҥ сынньанар” диэн бириинсибинэн. Ол рекламаны биэрээччилэр кинилэр харчы бөҕөтүн уган биэрбит рекламаларын дьон көрбөтүн, тута атын ханаалга көһөрөрүн, эбэтэр ол кэмҥэ тура охсон дьиэни-уоту хомуйарын, иһити сууйарын учуоттаабат буоллахтара.

“Саха” НКИХ артыыстарбытын аһара дэлэйдик рекламалыыр. Онуоха араас аудио-видео устууну, араадьыйаны, көмпүүтэри уо.д.а. эбэн кэбис. Ол иһин, бу дьон тыа улуустарыгар кэнсиэрдии бардахтарына дьон да сылдьыбата буолуо. Саха сирин нэһилиэнньэтэ аҕыйах. Сахата, холобур, 480-ча эрэ тыһ. Ону соҕурууҥҥу 10-чалыы мөлүйүөннүү киһилээх куораттар курдук санаан үлүмнэһии, тэҥнэһэ сатааһын сыыһа. Туох эрэ сиэр, кээмэй баар буолуохтаах. Биир артыыстары уһун сылы быһа эргитэ сылдьан, куһаҕан түүлбүтүгэр көстөр буолуохтарыгар диэри нөҥүөлээн, күҥҥэ сүүстүүтэ соһо сылдьыы сүрэ бэрт.

Биллэн турар, мин сурукпуттан сиэттэрэн реклама сүтэн хаалара биллибэт. Ол да гыннар, саатар олохтоох тэлэбиидэнньэбит дьон санаатын ылыныа, сиэрэ суох дэлэйбит рекламатын аҕыйатыа этэ.

Константин Еремеев,

                                                                                                                  Нам.