Бэҕэһээҥҥиттэн Булуҥ улууһугар Бырабыыталыстыба отчуота саҕаланна. Нэһилиэнньэ иннигэр Бырабыыталыстыба бэрэссэдээтэлин бастакы солбуйааччы Алексей Колодезников салайааччылаах бөлөх отчуоттуур. Улуус киинигэр − Тиксиигэ отчуот кэмигэр олохтоохтор улуус национальнай ыстаатыстанарын туруорустулар. Маны таһынан, Тиксии-3 диэн киин бөһүөлэктэн 8-9 км тэйиччи сытар, уруккута байыаннай чаас, Тиксии-1-тэн арааран, туспа административнай нэһилиэнньэлээх пуун оҥорорго этии киллэрдилэр. Тиксии-3-тэн киин бөһүөлэккэ диэри оптуобус сырыыта олус мөлтөх эбит. Инньэ гынан, бу улуус сиригэр-уотугар сир баайын хостуур “Анаабыр Алмаастара” хампаанньа саҥа оптуобуһу ылан биэрэрин туруорустулар. Олохтоохтор “Сбербааҥҥа” үлэһит тиийбэтин, онон үлэ атахтанарын эттилэр уонна бу боппуруоһу түргэнник быһаарары туруорустулар. Таарыйа эттэххэ, “Анаабыр Алмаастара” Анаабыр, Булуҥ, Өлөөн улуустарын кытары Сөбүлэҥ түһэрсиэҕиттэн ыла, бу улуустарга социальнай бырагыраамалары олоххо киллэриигэ балай да үбү көрөр. Быйыл Булуҥ улууһугар хампаанньа 21 мөл. солк. көрбүт.
Тиксии олохтоохторо иһэр ууларын ылар Мелкое күөллэрэ быһыта суох буолан, устан хааларын, уолар кутталлааҕын эттилэр. Инньэ гынан, быһыт тутар уолдьаспытын эттилэр. Тиксиилэри долгутар кыһалҕа элбэх: доруобуйа харыстабыла, сөмөлүөтүнэн айан сыаната, Хотугу муора суолун сайыннарыы, исписэлиистэр итэҕэстэрэ уо.д.а. Алексей Колодезников Японияны кытары кыттыгас паарканы тутуу саҕаламмытын эттэ. Бу паарка тыалтан энергетиканы ылар аналлаах. Саҥа тутуу 2020 сылга үлэҕэ толору киириэҕэ.
