Ким эрэ эйигин үөхтэҕинэ...

29.10.2013 17:08 | Автор: Кыым | Көрдүлэр: 2347   
Печать

66_copy_copy_copyИитиитэ, кэрээнэ суох, кыра да култуура дуома сыстыбатах дьоно кэпсэтэ, мөккүһэ турар киһилэрин баламат тылынан, үөҕүүнэн баһыйа сатыыр үгэстээхтэр. Оннук киһиэхэ бэйэтин курдук баламаттык хоруйдаһан иирсээни эрэ дириҥэтиэххэ, өтөрүнэн бүппэт уһун-киэҥ этиһиини-үөхсүүнү эрэ күөртүөххэ сөп. Ким эрэ эйигин үөхтэҕинэ, бастатан туран, утары хаһыытаһар, үөхсэр санааны, күөмэйгиттэн төлө көтөн тахсан эрэр уоттаах-төлөннөөх тыллары хам баттаныллыахтаах.

Үөҕэр, баһааҕырдар хара тыллары үөхсүүнэн буолбакка, сытыы уонна дьээбэлээх тылынан эрэ кыайыллар дииллэр. Өскөтүн онно хоруйдаһар сөптөөх тыллар төбөҕөр киирэ охсубат буоллахтарына, кыра да өһүргэнии сибикитин биллэрбэккэ эрэ “туох да ис хоһооно суоҕунан” мичээрдээн баран киһигит хараҕын супу көрүҥ. Эйигиттэн хардарсар тыллары күүтэн, өссө эбии кыһыылаах, ньүөлүтүүлээх тыллары этээри оҥостон турар “өстөөх” тута мух-мах барыа, былаана барыта ыһыллыа.

Эйигин үөхпүт киһи эн тас көрүҥҥүнэн “киирэр” буоллаҕына (“быччайа сытыйаҥҥын...”, “ырдьаҥныыгын”, “сибиинньэ курдуккун...” эҥин диэтэҕинэ), букатын кыыһырбакка туран үгэ-хоһоон аҥаардаахтык “эҥкилэ суох киһи диэн суох, хайдах тугум барыта үчүгэй буолуоҕай?”, “эн сирэйиҥ эмиэ наһаа үчүгэй”, “кыһыта-кыынньыы сатаама, оннооҕор буолуоҕу истэн кэлбит киһибин” эҥин диэ. Киһиҥ салгыы тугу диирин билбэккэ тохтоон хаалыа, оттон аттыгар турбут дьон хараҕар эн кыайыылаах хаалыаҥ.