Мииринэйгэ Сунтаар «Татыйыыната» үлэтин сөргүттэ

Алмаастаах кыраай олохтоохторо ыаллыы улуустан сибиэһэй бородууксуйаны амсайаммыт сүрдээҕин сэргэхсийэн эрэбит.

Манна дьиэ бэлимиэнэ,  ынах уонна куурусса ыыһаммыт эттэрэ, тефтель, кэтилиэт, гуляш этэ, Бордоҥҥо оҥоһуллубут битэмииннээх “Үҥкүр” утах, сахалыы лэппиэскэ үс көрүҥэ – иэдьэгэйдээх, сэлиэһинэйтэн, оруос бурдуктан  бааллар.  Бирээнньиктэр, туортар, пирожнайдар.  Кэмиттэн кэмигэр үүт оҥоһуктар – суорат, үүт, чөчөгөй, быырпах кэлэллэр.

Ынах арыыта, Сунтаарга оҥоһуллубут  дэҥҥэ да буоллар баар буолааччылар. Кэмпэндээйи аһылыкка туттуллар тууһа биэстии киилэлээх мөһөөччүктэринэн кыстана сытар.

Аны өссө, эт, оҕуруот аһа кэлэрэ буоллар диэн баҕа санаалаахпыт. Дьэ арай биир күчүмэҕэйдээхтэр. Сибиэһэй бородууксуйаны аҕалар буоланнар бэйэлэрэ туспа эрэсиимнээхтэр. Бородууксуйаны аҕалар массыыналара ардыгар алдьанар.  Ол иһин маҕаһыын субу-субу сабыллан хаалар. Ону дьон сөбүлээбэт.

Ардыгар уочарат мунньуллан, мииринэйдэр хаһан да аһаабатах дьон курдук ыһыытааһыннаах, үөхсүүлээх этиһиилэрэ салыннарар.Мииринэй быйыл хамсыгынан сибээстээн күһүҥҥү быйаҥ дьаарбаҥкатын сол да ыыппакка олорор.Сибиэhэй эт,  хортуоппуй, оҕурсу, помидор Сунтаартан кэлбэтэ. Аһылык  тутахсыйан,  Мииринэй ырыынага букатын дьүдэйдэ.

Онно көр, манна көр – хантан кэлбитэ биллибэт сүмэһинэ сүүрэн хаалбыт эт, халбаhыылар, сарделькалар, сосискалар, кэтилиэт, эриллибит эт.Ханна эрэ, биэ кыыгынас кымыhын ыймахтыыллар, сылгы эмис хартатынан эмсэхтэнэллэр, үрүмэлээх дагданан үссэнэллэр.Биhиэхэ ол сыта да суох. Сахалыы, «чэгиэн ас» манна мэлигир. Онон, «Татыйыына» фирма үлэтин-хамнаhын сабардамын кэҥэтэн, Мииринэй оройуонугар быһайын иккистээн кэлбитин төрүт олохтоох дьон биһириибит .