Хаҥалас улууһун дьаһалтатын пресс-сулууспата иһитиннэрэринэн, Покровскай куорат олохтооҕо, 71 саастаах дьахтар от ыйын 30 күнүгэр, Хачыкаат нэһилиэгин тыатыгар сугуннуу сылдьан сүтэн хаалбыт.
Оройуоннааҕы Биир Кэлим Диспетчерскай Сулууспатыгар кэпсээбиттэринэн: «Бииргэ сир астыы сылдьыбыт аргыстара, дьахтар киэһэ болдьоспут сирдэригэр тахсыбатаҕар түрүлүөн тарпыттар. Дьахтар сүппүт сирэ кута-маар дойду буолан көрдүүргэ балаһыанньа уустугурбут. Сааһырбыт киһи тыаҕа соҕотох сылдьара олоҕор да доруобуйатыгар да кутталлаах буолбут».
Полиция үлэһиттэрэ, быыһааччылар, волонтердар сүппүт киһини көрдөөн тыаны биир гына тараахтаан хаампыттар. Көрдөөбүттэрэ бэһис күнэ барбытыгар биирдэ дьахтар көстөн кэлбит. Суол таһынааҕы «Легион» кафеттан 3,5 км ыраах. Кинини, квадрокоптерынан көрдүү сылдьыбыт волонтер Игнатий Руфов булбут.
Билигин, кырдьаҕас киһи доруобуйатыгар туох да суоһаабат. Социальнай ситимнэргэ, кини хайдах муна сылдьыбытын туһунан кэпсээнэ тарҕана сылдьар, итиэннэ эмээхсин быыһааччыларга махтанар.
Кырдьаҕас киһи кэпсиир: «Мин туран баран барбытым. Кэмниэ-кэнэҕэс хаһыытаан барбытым, ким да хардарбатаҕа. Санаабар тахсыахтаах сирбэр баран иһэр курдугум. Ол эрээри хайысхабын сыыспыт этим. Сиргэ олорон баран эмиэ үөгүлээбитим – уу чуумпу. Суолга тахсан бэйэм дьоммун көрсүөм дии санаабытым. Ити курдук биэс күн хаампытым». Ыарҕа талах быыһынан хаамарга, дьахтар бэйэтигэр тайах мас оҥостубут. Күнүс эрэ утуйар эбит, түүн тымныы буолан ирээри хааман тахсыбыт. Оҥоойугар баар сугунунан аһылыктана сылдьыбыт, сэбирдэххэ сөҥмүт ардах уутунан тамаҕын ханнарбыт.
