Тыа хаһаайыстыбатыгар сыл ахсын уонунан милийээр үп көрүллэр дииллэр. Үлэһитигэр онтон төһөтө тиийэрэ – туһунан ыйытык. Арай “ханна барара биллибэт” харчыттан төһө эрэ кээмэйи анал бырагыраама оҥорон онно ыытыахха.
Холобур, маннык тэриннэххэ хайдаҕый? Ити алмаас-көмүс үгүс тэрилтэтин курдук, саатар, биир тыа хаһаайыстыбатын учаастагын тэрийэн үлэлэтиэххэ. Хаһан да курааннаабат Кэбээйи диэки эбэтэр Бүлүү эҥээр улуустарга сөптөөх сири анаан туран. Хас эмэ сүүс биэрэстэ сиринэн таһа сатаабат гына, ото-маһа үрдүттэн буоларын курдук. Ол тэриллэр учаастакка дьон үлэлииригэр сөптөөх усулуобуйаны тэрийэн, сөбүгэр сыаналаах хотоннору, дьон олороругар үчүгэй дьиэлэри тутан, уота-күөһэ, уута-хаара толору буолар гына. Дьэ, уонна онно билигин алмаас үлэһиттэрин курдук, холобур, үстүү ый баахтанан үлэни тэрийиэххэ. Үчүгэй хамнастаах буоллаҕына, эдэр, кыанар дьон үлэлиэ этилэр. Олорор-үлэлиир усулуобуйаларын үчүгэйдик тэрийиэххэ. Алмаас тэрилтэтиттэн итэҕэһэ суох гына. Манна биир уустук бэрээдэк боппуруоһа буолуон сөп. Тута бэрээдэги ирдээн, иһэр-аһыыр дьону ылбат гына тэрийиэххэ. Бэрээдэги араҥаччылыыр уорганнары кытта кэпсэтэн, көрө-истэ сылдьалларын хааччыйыахха. Арыгы, быраага туһунан толкуй да кииримиэн наада. Кураан сыл иһэр дииллэр. Киин улуустарга оччотугар сүөһү ахсаана лаппа аччыыра буолуо. Оту тыһыынчанан биэрэстэлээх сиртэн таһа-тиэрдэ сатыыр улахан ночоот.
Өлөксөй Лыткин, Мэҥэ Хаҥалас.