Амма улууһун дьаһалтатын пресс-сулууспата иһитиннэрэинэн, баһылык Николай Архипов улууска туризм эйгэтигэр үлэлиир урбаанньыттары кытары көрсүбүт.
Онно экэнэмиичэскэй сайдыы уонна былаанныыр управление начаалынньыга Роман Алексеев, "Бизнес Инкубатор" дириэктэрэ Евгений Афанасьев, "Мин биисинэһим" киин салайааччыта Владимир Колосов, урбаанньыттар Эльвира ПЕстерева уонна Николай Апросимов кыттыбыттар.
Кэрэ айылҕалаах Амма сиригэр-уотугар элбэх киһи сынньана тоҕуоруһар. Онон улууска туризм күүскэ сайдарыгар толору кыах баар, онтон улуус олохтоохторо, бүддьүөтэ харчылаһыан сөп. Баһылык Николай Архипов ити кыаҕы толору туһанарга, туристарга кэрэ айылҕаны эрэ буолбакка, олохтоох аһы-үөлү, историческэй суолталаах түгэннэр буолбут сирдэрин көрөдөрөр маршруттары оҥорон угуйуохха сөбүн эппит. Бастатан туран сөптөөх инфраструктура оҥоһуллара наадатын ыйбыттар. Баар турбазалары толору хааччыллыылаах гына оҥорорго, уоту тардарга, суолу оҥорорго үлэ күүскэ барыахтааҕын эппиттэр. Ааспыт сыл сайыныгар Амма турбазаларыгар 12 тыһ. киһи сынньаммыт. Амма улууһугар туристыыр кластеры тэрийэр туһунан Ил Дархан этэн турар.