"Саханефтегазсбыт" генеральнай дириэктэригэр, Ил Түмэн дьокутаатыгар Виктор Лебедевка тэриллибит холуобунай дьыаланы силиэстийэлээн түмүктээбиттэр уонна суут көрүүтүгэр ыытыахтара. Бу туһунан Силиэстийэлиир кэмитиэт Саха сиринээҕи управлениетын пресс-сулууспата иһитиннэрэр.
32 саастаах генеральнай дириэктэри, дьокутааты Арассыыйа ХК 115 ыст. 1 ч. кэспитигэр, ол эбэтэр киһи доруобуйатыгар кыра эчэйиини оҥорууга уорбалыыллар.
"Холуобунай дьыаланы силисэтийэлииргэ олус элбэх силиэстийэлиир уонна процессуальнай дьаһаллар ыытыллыбыттара. Ол иһигэр атын эрэгийиэҥҥэ эспиэртиир чинчийии барда. Уорбаланааччы буруйун дакаастыыр сөптөөх матырыйаал хомулунна. Буруйдуур түмүгү куорат борокуруорун солбуйааччыта бигэргэппитэ, билигин суут көрүүтүгэр ыытылынна", - диэн эрэгийиэннээҕи Силиэстийэлиир кэмитиэт иһитиннэрэр.
Эмсэҕэлээччи - Владимир Стрижак. Кинини тойоно Лебедев Ленскэйгэ үлэлэтэ ыыта сатаабыт. Ону кытары Стрижак сөбүлэспэтэх - "билиҥҥи дуоһунаспыттан намтатта" диэн ылымматах. Онуоха Лебедев туох да биричиинэни быһаарбакка, Стрижакка "баҕа өттүнэн уурай" диэн сайабылыанньаны көрдөөбүт. Ону Стрижак биллэн турар сөбүлэспэтэх. 2019 сыллаахха ахсынньы 19 күнүгэр Стрижак уоппускаҕа барарын туһунан сайабылыанньаны биэрээри Лебедев кэбиниэтигэр киирбит. Онуоха Лебедев үлэһитин үөхпүт уонна охсуолаабыт. Ол бириэмэҕэ Стрижак кэбиниэттэн куоппут, онуоха Лебедев сырсан тиийэн охсуолаабыт. Бу — силиэстийэ сабаҕалыырынан.
Стрижак мунна тостубут, хаан туруулааҕа бэлиэтэммит. Лебедев буруйун билиммэтэх.
Былырыын тохсунньуга "Биир ньыгыл Арассыыйа" баартыйаттан Лебедевы таһаарарга сорудахтаабыта. Оттон Ил Дархан эрэдээктэрдэри кытары көрсүһүү кэмигэр "Лебедевтээх кэпэстиилэрэ тарҕаммыттарын истибитиҥ дуо? туох дии саныыгыный"диэн ыйытыыга "тустаах уорганнар быһаарбыттарын кэннэ кэккэ дьаһаллары ылыныаҕым" диэн эппитэ.
