“АртДойду” киинэ хампаанньата “Американ Фильм Маркет 2020” диэн аан дойдуга биллэр, бөдөҥ киинэ ырыынагар анаан “Карина” киинэ тизерин (киинэ сүрүн ис хоһоонун көрдөрөр кылгас видео-ролик) таһаарда. Тизери бу сайын киинэни устарга бэлэмнэнэ сылдьан устубуттар.
Эмиэрикэтээҕи киинэ ырыынага – киинэ индустриятын профессионалларын түмэр улахан түһүлгэ. Манна сыллата 70 араас дойдуттан 7 тыһыынча кэриҥэ хампаанньа-тэрилтэ кыттар. Быйыл ол тэрээһин сэтинньи 9-13 күннэригэр “онлайн” ыытыллар.
“АртДойду” ити түһүлгэҕэ түөрт киинэнэн кыттар: “Мой убийца” (“Сайсары күөлгэ түбэлтэ”), “Иччи”, “Legends of Olonkho Land” уонна өссө да уһулла илик “Карина”. 2014 сыллаахха 12 күн устата тайҕаҕа муна сылдьыбыт Карина Чикитова туһунан киинэни устарга продюсер Марианна Скрыбыкина ылсыбыт.