Ааспыт нэдиэлэҕэ “Аэропорты Севера” федеральнай казеннай тэрилтэ 18 аэропордун үлэһиттэрэ – балтараа тыһыынча кэриҥэ киһи Арассыыйа бырабыыталыстыбатын бэрэссэдээтэлэ Владимир Путин аатыгар аһаҕас суругу суруйан ыыппыттара. Бу туһунан “Кыым.ру” сырдатан турар. Манна кинилэр тэрилтэ салалтата үлэһиттэр хамнастарын намтатан, тэрилтэ ороскуотун сабар быһаарыыны ылыммытын туһунан эппиттэр. Күн бүгүн бу суругунан тырааныспар прокуратурата бэрэбиэркэ ыытар.

“Аэропорты Севера” тэрилтэ бары филиалларын салайааччылара итиэннэ авиаүлэһиттэр профсоюзтарын рескома көрсөн мунньахтаатылар. Тэрилтэ генеральнай директора Павел Халин: “Ороскуоту намтатыы туһунан быһаарыы сүрүн төрүөтүнэн 2012-2014 сылларга “Аэропорты Севера” тэрилтэни субсидиялыыр былаан буолла. Субсидия урукку сыллартан биллэ намтаата. Итини сэргэ тэрилтэҕэ эбии Магадан уобалаһын икки уонна Приморскай кыраай үс аэропортара холбоннулар. Салгыы өссө хас да аэропорду холбуур былаан баар. Ол эрээри маныаха федеральнай бюджеттан үбүлээһин кээмэйэ улааппат. Онон тэрилтэҕэ ороскуоту аҕыйатыы син-биир баар буолуоҕа. Ол эрээри күн бүгүн саҕалана илик, мунньах түмүгүнэн сыл иккис аҥаарыгар көһөрөр туһунан быһаарыы ылылынна. Билиҥҥитэ тэрилтэҕэ ороскуоту намтатыы үлэтэ хайдах барыаҕын чопчу быһаара иликпит. Маннык балаһыанньаҕа аан дойдуга туһаныллар уопуту хатылыахпытын сөп, ол эбэтэр биир киһи хас да үлэни тэҥинэн толорор бэрээдэгин киллэриини эмиэ көрүөхпүтүн сөп,” – диэн эттэ.