Мииринэй аттыгар былырыын ньиэп тохтубут сирин бэрэбиэркэлээтилэр

Соторутааҕыта  Мииринэй куорат былаастара уонна Мииринэйдээҕи Айылҕа харыстабылын судаарыстыбаннай кэмитиэтин бэрэстэбиитэллэрэ, "Илин Сибиир" ньиэби хостуур хампаанньа  "Иирэлээх" диэн ааттаах самалык тэрилтэтин утумугар буолбут саахал миэстэтин сыныйан бэрэбиэркэлээтилэр.

Санатан эттэххэ, 2019 сыл бэс ыйын 7 күнүгэр "Интернациональнай" рудниктыыр суол ойоҕоһугар баар, соҕуруу диэки суккуллар ньиэп утумуттан уон туонна ньиэп тохтон, 4,5 гектар иэннээх сири бүрүйбүтэ.
Уон туонна ньиэп тыаҕа тохтубута – улахан экологическай быһылаан.
Баара-суоҕа биир лиитирэ ньиэп муораҕа тоҕуннаҕына, 100 кв. миэтэрэ иэннээх сири киртитэр. Ону учуоттуур наада.
Ити курдук, Мииринэйтэн баара-суоҕа 7 эрэ биэрэстэлээх сиргэ буолбут саахал улахан кутталы үөскэппитэ.
Ньиэп холохойо үрүйэлэринэн,  Иирэлээх үрэххэ өтөн киирэр куттала суоһаабыта. Ол аата биһиги иһэр уубутун ылар Иирэлээхпит аны ньиэптэн киртийэр куттала сириэдийбитэ.
Сокуон кытаанах. Айылҕаны киртитээччигэ ирдэбил күүһүрэр.
Саахалы таһаарбыт тэрилтэ -"Иирэлээх" аахсыйалаах холбоһук, түүннэри-күнүстэри тохтубут ньиэби хомуйар, уматык тохтубут буордарын-бадарааннарын суһаллык тиэйэр түбүккэ түспүтэ.
Ньиэп Иирэлээх үрэҕин салаа үрүйэлэригэр киирбэтин курдук мэһэйдиир боннары уурталаабыттара, холохойу оборор уонна симэлитэр сорбеннары, биологическай эттиктэри буолунайдык кутаттаабыттара.
2019-2020 сыл сайыннарыгар, ньиэп тохтуутун таһаарбыт тэрилтэ, балачча үлэни ыыппытын, бэрэбиэркэлээччилэр бэлиэтээтилэр.
Саахал тахсыбыт сирэ Иирэлээх үрэҕин таһымыттан быдан үрдүк, сис оройугар сытар. Манна барыта үрүйэ-харыйа сирдэр. Онон тохтубут ньиэп Иирэлээх үрэҕэр, Зимняй үрүйэтинэн киириэн сөбө.
Ону Росприродназор уонна Саха сирин Айылҕа харыстабылыгар министиэристибэтэ, эрэй эрдэтинэ, саахалы туоратар үлэлэргэ ирдэбили күүһүрдэн тураллар. Ол эрэн саахал содула билигин да толорутук көнө илик.
Ньиэп сорҕото кыра көлүкэлэргэ, үрүйэлэргэ син-биир иҥмитэ биллэр.
Халаан, улахан ардахтар кэмнэригэр, ньиэптээх уулар  Иирэлээх үрэҕэр сыккыстаан киирэр кутталлара дьөрү кыччаабат.
Быйыл Мииринэйгэ кураан сайын, күһүн буолан абыраата.
Онон ньиэптээх бадарааны массыыналар балачча тиэйдилэр.
Бэрэбиэркэ түмүгүнэн, ньиэп тохтубут сиригэр балаһыанньа арыый да аматыйбыта бэлиэтэннэ.
Ол эрэн, үлэлэр салгыы ыытыллалларыгар олохтоох былаастартан саҥа ыйыы-кэрдии киирдэ.
Саах ал содулун туоратыы 2021 сыл күһүнүгэр эрэ уолдьаһара былааннанар.
Билигин да үлэ баһаам.

Станислав Алексеев, Мииринэй куората.