Дьокуускайга Даркылаах тиксиитигэр паромҥа киириэхтээх 20 таһаҕас тиэйэр уонна 60 дьоҕус массыына турарыгар аналлаах мунньар, тохтотор пууну (накопитель) оҥоро сылдьаллар. Паромнар булгуччу 35 мүнүүтэ буола-буола сылдьар, массыынаны шлагбаум нөҥүө аһардар буолуохтара.
Санаттахха, өтөрдөөҕүтэ чааһынай паромнаах дьон кыттыһан биир тэрилтэлэммиттэрэ. Бу күннэргэ мунньар пуун оҥоһуллан бүтэн эрэр, шлагбаум турара хаалла. Кытылга бэрээдэги көрөр ЧОП үлэһиттэрэ баар буолуохтара, суол быраабылатын кэһиини көрөр камералары туруоруохтара.
“Паромная переправа-1” ХЭУо бэрэстэбиитэлэ Николай Ефремов үлэ-хамнас СӨ Көлөҕө министиэристибэтин сөбүлэҥин ылбытын этэр:
– Урут хас биирдии паромнаах киһи бэйэтэ-бэйэтигэр сылдьар буоллаҕына, билигин холбоһон биир тэрилтэни тэрийдибит.
Олус судургу. Суоппар тиксиигэ кэлэн, мунньар пууҥҥа киирэн, иллэҥ балаһаҕа турар, анал будкаттан билиэтин атыылаһар, ол кэннэ ыйыллыбыт тиксиитигэр барар. Паромнар бары биир кэмҥэ сылдьыахтара суоҕа, кыраапыктаах буолуохтара. Ыйар-кэрдэр баннердар ыйаныахтара. Бэрээдэги хонтуруоллуур харабыллар, суол быраабылатын кэһиини бэлиэтиир камералар үлэлиэхтэрэ.
Өскөтүн Дьокуускайдааҕы мунньар пууну этэҥҥэ үлэлэттэхпитинэ, Аллараа Бэстээххэ эмиэ оннугу тэрийиэхпит, – диир Николай Ефремов.