Үрүҥ дьиэҕэ хоруупсуйа хончоҥнос

22.05.2013 16:08 | Автор: Кыым | Көрдүлэр: 2512   
Печать

89565Былырыын СӨ Бырабыыталыстыбатын дьиэтигэр Хоруупсуйаны уодьуганныыр анал департамент тэриллэн үлэлээбитэ. “Үлэлээбитэ” диир сыыһа буолуохтаах. Аатыгар эрэ тэрилиннэҕэ, үлэтин Ис дьыала үлэһиттэрэ оҥордохторо. Бэл, муннуларын анныгар хоруупсуйа хончоҥноһун билбэккэ харахтарын саба баанан олорбуттар. Бырабыыталыстыба чунуобунньуктара дуоһунастарын туһанан дьиэни-дьиэнэн үллэстэ олорбуттарын туһунан иһитиннэрии сири-буору аннынан иһиллибитэ. “Ама, дуу?!” диэн соһуйбуппут сыччах. Этэрбэс араадьыйата барахсан тугу сыыс түһэрбитэ баарай... Иһитиннэрии кырдьык буолан таҕыста.

Бэрэсидьиэн уонна бырабыыталыстыба дьаһалтатын салайааччытын солбуйааччы Елена Зданович сымыйа докумуонунан субсидиянан дьиэ ылбыта биллибит.

Ол курдук, силиэстийэ биэрсийэтинэн, чунуобунньук социальнай төлөбүрү туһанан албын докумуону биэрэн дьилэниэн баҕарбыт. Чунуобунньук, дьиҥэ, бэйэтигэр икки хостоох уонна биир хостоох кыбартыыралардаах буолан, биирдэ бэриллэр көмөҕө хайдах даҕаны хабыллар кыаҕа суох. Соруйан, олорор усулуобуйатын “мөлтөтөөрү” икки хостоох кыбартыыратын ийэтигэр “атыылаабыт”. Сыал-сорук ситиһиллиэхтээҕэ биллэр. Дьахтар тугу барытын умнан туран, хара санаатын олоххо киллэрэргэ санаммыт. Бастатан туран, икки хостоох кыбартыыратын суолун-ииһин сотоору, пааспарын уларытар туһунан сайабылыанньа биэрбит. Уолун кытары саҥа тутулла турар кыбартыыраларыгар регистрацияламмыттар.

Субсидия ылар быраабы биэрэр хамыыһыйаҕа докумуон туттарарыгар, икки хостоох кыбартыыралааҕын, онтун ийэтигэр атыылаабытын биллэрбэтэх. Быһата, кистээбит.

Инньэ гынан, хамыыһыйаҕа туттарбыт докумуонунан бырабыыталыстыбаттан “Саха Ипотечнай агентство” счетугар киниэхэ анаан 1 мөлүйүөн 700 солкуобай кэлэн түспүт.  Силиэстийэлиир кэмитиэт дьыаланы ымпыгар-чымпыгар тиийэ ырытан, баар дакаастабыллары түмэн дьыаланы суукка утаарбыт.

Көрөргүт курдук, чунуобунньук албын суолга киирэн туран, икки кыбартыыралаах дьиэтин түөкүннээн, баайын-дуолун хаҥатаары судаарыстыбаҕа улахан хоромньуну таһаарбыт.