CӨ Үрдүкү суутугар Сунтаар улууһун Куокуну нэһилиэгин олохтоохторуттан

02.11.2012 16:10 | Автор: Кыым | Көрдүлэр: 2960   
Печать

Биһиги, Сунтаар улууһун Куокуну нэһилиэгин олохтоохторо, бу сыл алтынньы 2 күнүгэр Спартак Филиппович Егоровы хара санаалаах киһи кыыллыы өлөрбүтүттэн олус улаханнык соһуйан-уолуйан, айманан олоробут. Спартак биһиги харахпыт ортотугар улаатан, үлэлээн-хамсаан, ыал аҕа баһылыга буолан олорбута.

Аҕата Филипп Титович Егоров – үлэһит үтүөтэ, сытыары-сымнаҕас киһи этэ. Эмиэ эдэр сааһыгар үс кыра оҕотун тулаайах хаалларан, ол сэбиэскэй кэм саҕана баппатах баламат киһи илиититтэн суорума суолламмыта. Ийэлэрэ Татьяна Алексеевна, дьахтар хоһууна буолан, кыра хамнаһыгар эбии сүөһү ииттэн, оҕолорун атахтарыгар туруортаабыта. Спартак оскуолаҕа олус үчүгэйдик үөрэммитэ. Ол эрээри соҕотох ийэтин аһынара бэрт буолан, үрдүк үөрэххэ талаһа сатаабатаҕа. Аармыйаҕа ытык иэһин толорон кэлээт, ыал буолан, уоллаах кыыс оҕону төрөтөн улаатыннартаан, быйыл сайын сиэн минньигэс сытын билэн, дьоллоох дьиэ кэргэн аҕа баһылыга буолбута. “Кириэстээх” ТХПК сүөһү иитиитин салаатыгар – солбуллубат төһүү үлэһит быһыытынан биллэрэ. Дьоҥҥо-сэргэҕэ куруук эйэҕэс сыһыаннаах, күлэ-үөрэ сылдьыбыт киһибит олохтон барбыта олус хомолтолоох.

Сунтаар улууһун оройуоннааҕы Суутун быһаарыытынан, бу дьыалаҕа уорбаланааччы Г. хаайыллыбата. Бу суут быһаарыытын биһиги төрдүттэн сыыһанан ааҕабыт. Туох да буруйа суох киһини кыыллыы, сидьиҥник өлөрбүт киһи уопсастыбаҕа кутталлааҕын, холуобунай дьыала тэриллэр кэмигэр күрүү сылдьыбытын, өссө даҕаны эппиэтинэстэн куотуон сөптөөҕүн ыйан туран, бу киһини суут буолуор диэри тутан хаайалларыгар модьуйабыт.

Сунтаар улууһун Куокуну нэһилиэгин

226 олохтооҕо илии баттаабыт.

Ону дьаһалта испэсэлииһэ Е.Н. Генерова бигэргэппит.