Сахаҕа “инникини тымтыктанан көрбүт суох” диэн уос номоҕо баар. Ол эрээри инчэҕэй эттээх, тэбэр сүрэхтээх дьон буоларбыт быһыытынан, син быһа тарыйан да буоллар, иннибитигэр туох күүтэрин билиэх-көрүөх санаабыт ардыгар баһыйар. Ким ханнык ыйга төрөөбүтүнэн сылыктаан, үүнэр сылга үрдүк халлаан сулустара тугу сипсийбиттэрин, билгэлээбиттэрин ааҕыах.

Кытай гороскуобунан 2021 сыл маҥан (металлическай) өҥнөөх ОҔУС сыла. Уопсайынан эттэххэ, Оҕус сыла бу ааһан эрэр Кырыыса сылыгар холоотоххо, быдан чуумпу, нуурал буолуоҕа. Ааһан эрэр уустук сылы ырыҥалаан көрөргө, саҥа олоҕу ылынарга-суолталыырга үөрэтэр түгэннэри тосхойуо.

Ханнык ыйга, кэмҥэ төрөөбүтүттэн тутулуга суох дьаныардаах, дьулуурдаах, хорсун санаалаах, көнө сүрэхтээх дьону улахан ситиһии, табыллыы күүтэр. Үлэни таптыыр, муударай кыыл оннук дьону сөбүлүүр, кинилэргэ үөрүүнү, дьоллоох түгэни дэлэйдик бэлэмнээн олорор диэн сулустар сипсийэллэр. Онон, харса суох үлэлээҥ, айыҥ-тутуҥ, сыалы ситиһэр туһугар дьулуурдаах, тулуурдаах буолуҥ!

КҮРҮЛГЭН

(тохсунньу 21 к. – олунньу 19 к.)

Сыл саҥатыгар күннээҕи олоххутугар-дьаһаххытыгар, чугас киһигитин кытта сыһыаҥҥытыгар, бэл, оннооҕор идэҕитигэр тиийэ тугу эрэ уларытыаххытын баҕарыаххыт. Биир күдьүс барар олохтон салҕа быһыытыйбыккыт, сүрэххит уларыйыыны эрэйэр. Ол эрээри олоххутугар улахан уларытыыны киллэрэргитин саас бүтүөр диэри туттунуҥ. Бастатан туран, сыл хаһаайына Оҕус түргэн-тарҕан быһаарыныыны буолбакка, ыллыктаах тылы-өһү ордорор. Иккиһинэн, сыл иккис аҥаарыгар кыһалҕаҕыт дөбөҥнүк быһаарыллыа. Элбэх харчыланыаххытын баҕарар буоллаххытына, үчүгэй сибээһи олохтооҥ, наадалаах кэмҥэ, түгэҥҥэ баар буола сатааҥ. Кыһалҕа үөскээтэҕинэ, дьонтон көмө көрдүүргүтүн кыбыстымаҥ, ким да аккаастыа суоҕа. Тапталлааххытын кытта сыһыаҥҥытын бөҕөргөтөргүтүгэр бэрт сыл. Соһуччу бэлэхтэ оҥоруҥ, үөрүүлээх да, хомолтолоох да кэмҥитигэр мэлдьи бииргэ буолуҥ. Идиэйэҕит өрө ыһылла сытар. Үчүгэйдик сааһылаатаххытына, тупсаран-чочуйан биэрдэххитинэ, киһи астынар бырайыага айыллан тахсыа.  

БАЛЫКТАР

(олунньу 20 к. – кулун тутар 20 к.)

Сыл устата Балыктар, куолуларынан, аа-дьуо уста сылдьыахтара. Соһуччу түгэн да, суһал эппиэти эрэйэр быһыы-майгы да эһигини улаханнык долгутуо, ууга-уокка түһэриэ суоҕа. Сорохтор сыалларын ситиһээри күннэри-түүннэри утуйбат, аһыыр астарын умнан түбүгүрэр, сүүрэр-көтөр эбит буоллахтарына, Балыктар сэмээр сылдьан эрэ элбэҕи ситиһиэхтэрэ, наадыйбыттарын булуохтара-талыахтара. Бу сыл устата эһигини элбэх сынньалаҥ күүтэр. Тапталлааххытын, чугас дьоҥҥутун кытта ыраах айаҥҥа турунан күнү-дьылы бараабакка эрэ, остуол тула олорон итии чэй иһэ-иһэ сэлэһиҥ. Онтон ордук дуоһуйуоххут, астыныаххыт. Айар куттаах дьоҥҥо таһаарыылаах сыл иһэр. Иэйии, идиэйэ киирдэр эрэ сүрэҕэлдьээбэккэ олоххо киллэриҥ. Үбү-харчыны эргитиигэ, инбэстииссийэлииргэ, үлэлиир дьон, сэрэхтээх буолуҥ. Уопсайынан, улахан харчыны хамсатар быһаарыыны ылынаргытын сыл бүтүөр диэри тохтоторгут ордук. Таптал чааһыгар барыта этэҥҥэ.

ХОЙ

(кулун тутар 21 к. – муус устар 20 к.)

Хойдор, үөрүҥ-көтүҥ: эһигини ситиһиилээх сыл күүтэр. Ол эрээри үүнэр сылга олус көҥүллүк сананан, бөппүрүөк хааҥҥытын киллэрэн, тура бэйэҕит эрэ баҕаҕытынан салайтарымаҥ. Эппиэттээх быһаарыыны ылынар түгэн үгүс буолуо. Сыта-тура үчүгэйдик толкуйдаан, ырытан көрөн баран, биирдэ быһаарынар куолу. Ыксыы, омуннура сылдьан, угаайыга киирэн биэриэххитин, сыыһа суолу талыаххытын сөп. Кулун тутартан сайын ортотугар диэри чуумпу, холку кэм күүтэр. Бу кэмҥэ ситиһэ илик дьыалаҕытын, сыалгытын олоххо киллэрэргэ туттумахтаан хаалыҥ. Сыл устата соһуччу мөккүөр, иирсээн күөдьүйүөн сөп. Оннук түгэҥҥэ киэҥ көҕүстээх буолуҥ. Оччоҕо сүүйүүлээх хаалыаххыт. Үүнэр сылга дьиэ кэргэн сыһыаныгар, доруобуйа чааһыгар барыта этэҥҥэ эбит буоллаҕына, күһүн урбаанынан дьарыктанааччыларга, бэйэ дьыалалаахтарга, уопсайынан, эргинэр-урбанар ханнык баҕарар тэрилтэ үлэһитигэр уустук балаһыанньа тахсыан сөп. Харчы, хамнас биир кэм: элбээн да, аччаан да барбат. Сыл бүтүүтүгэр таптал өттүгэр табыллыы, саҥа билсиһиилэр күүтэллэр.

ОҔУС

(муус устар 21 к. – ыам ыйын 21 к.)

Көрдөххө, тоҥкуруун, кыраҕа ымыттыбат курдуккут эрээри, ис-иһигэр киирдэххэ, сүрдээх бэһиэлэй, бэтиэхэлээх дьоҥҥут, эһиги – Оҕустар. Сылгыт улахан уларыйыыта, түһүүтэ-тахсыыта суох, нус-хас ааһыа. Кулун тутартан от ыйыгар диэри хаһааҥҥытааҕар да табыллыылаах кэмҥит. Барыта уурбут-туппут курдук орун-оннугар ыпсан иһиэ. Атастаргыт “везунчик” диэнтэн атыннык ааттыа суохтара. Сыл иккис аҥаарыгар харчыгытын ыһа-тоҕо туттумаҥ, наадата суоҕу атыылаһымаҥ. Харчыга ыктарыаххытын, улахан иэскэ киириэххитин сөп. Ол эрээри халадыынньык, таҥас сууйар массыына курдук күннээҕи олоххо наадалаах малы атыылаһартан туттунумаҥ. Доруобуйаҕытыгар эмиэ кэмчилээмэҥ. Быстах ыарыы тэһитэ кэйиэлээтэҕинэ, “чэ, ааһар ини” диэмэҥ. Уталыппакка эмтэнэ охсуҥ. Аһыы утаҕы амсайар дьон, аккаастаныҥ. Ыал дьон, быстах тапталтан, сыһыантан тэйэ туттуҥ. Хобдох түмүктээх буолуо. Оттон сулумахтар төттөрүтүн быстах дии санаабыт сыһыаннара үйэлээх буолан тахсыа. Эккитин-хааҥҥытын элбэхтик эрчийиҥ, салгыҥҥа сылдьыҥ, чугас дьоҥҥутугар кыһамньылаах буолуҥ.

ИГИРЭЛЭР

(ыам ыйын 22 к. – бэс ыйын 21 к.)

Биир дьыаланы тиһэҕэр тиэрдибэккэ эрэ атыҥҥа көһөн хаалар эбиккит. Үүнэр сылга итинник сонумсах быһыыгытын тохтотуҥ. Ити сүрэҕэ суоххутуттан буолбакка, төттөрүтүн, идиэйэнэн умайа сылдьаргытыттан тахсар. Тохтооҥ, уоскуйуҥ. Үлэҕитигэр былаанна оҥостуҥ. Таптал өттүгэр эмиэ олус эмоциональнайдык сыһыаннаһыаххыт. Инньэ гынан чугас киһигитин, төттөрүтүн, тэйитэн кэбиһиэххитин сөп. Аргыый наллаан, харыстабыллаахтык сыһыаннаһыҥ. Сороҕор өһүргэс, хоргутумтуо майгыгыт баһыйар, эппиккитин этэ тураҕыт. Чугас киһигитин кытта мөккүөргэ киирэ сатаамаҥ, уруккуну хостоон таһаара-таһаара этиһимэҥ. Итини тумуннаххытына, барыта этэҥҥэ буолуо. Оҕус сылыгар үлэни уларытарга, саҥа, сонун дьарыкка ылсарга табыгастаах сыл. Ол харчыны киллэриэн, дьиэ кэргэн дохуотун үрдэтиэн сөп.

АРААК

(бэс ыйын 22 к. – от ыйын 22 к.)

Араактар, дьэ, дуона да суохтан долгуйар дьоҥҥут. Бу сыл эһигини холку буоларга үөрэтиэ. Уоскуйуҥ, холкутуйуҥ, көҥүллүк тыыныҥ. Кыһалҕа баар да буоллаҕына, ону уустугурдумаҥ. “Бу барыта ааһыа” диэн санаанан салайтарыҥ. Тапталтан хомойор, кэлэйэр түгэн баар буолуон сөп. Ол эрээри ити – үчүгэйгэ. Бэйэҕит киһигитин, аналгытын син биир көрсүөххүт. Оҕуруктаах өйдөөх, киириилээх-тахсыылаах дьоҥҥо харчыны өлөрөргө бэрт сыл. Сатаатаххытына, харчыны “сэлээппэттэн хостоон таһаарар” курдук баһан ылыаххыт. Ол эрээри чэпчэки суолга охтумаҥ. Ыллыктаах суолу тутустаххытына, харчы киирэ туруо, өр аһатыа. Карьера оҥосторго Оҕус сыла эмиэ табыгастаах. Аймахтаргытын, кэллиэгэлэргитин кытта мөккүөргэ кииримэҥ, ол туох да үчүгэйгэ тиэрдибэт. Таптал чааһын этэр буоллахха, сыл иккис аҥаарыгар сулумах Араактары сонун билсиһиилэр күүтэллэр.

ХАХАЙ

(от ыйын 23 к. – атырдьах ыйын 23 к.)

Сылга 365 күн баар буоллаҕына, бу күннэр бары эһиэхэ “сюрприһы” бэлэмнээн олороллор. Ол туох “сюрприһа” диир буоллаххытына, маннык. Биир күн ыыра байбыт курдук сананыаххыт, иккис күн букатын туга да суох хаалбыт курдук буолуоххут. Уопсайынан, чуҥкуга суох сыл күүтэр. Ыксыыр-ыгылыйар наадата суох, ыпсыбатах дьыала, сыал-сорук кэмигэр орун-оннугар түһэн иһиэ. 2021 сылга дьоллоохпун дии сананаргытыгар барыта баар буолуо: доруобуйа, таптал, харчы, күүс-күдэх... Ол эрээри соһуччу түгэннэр тосхойуохтарын сөп. Холобур, сарбыллыыга түбэһэн атын үлэҕэ көһүү, оҕо кэлэрин билэн ыал буолуу уо.д.а. Онно дьон тылын истибэккэ, сүрэххит тугу этэринэн сөпкө быһаарыныҥ. Барыта этэҥҥэ буолуо.

КЫЫС

(атырдьах ыйын 24 к. – балаҕан ыйын 22 к.)

Ааһан эрэр сылга элбэҕи үлэлээбит, улаханнык долгуйан ылбыт буолаҥҥыт, кэлэр сылга олоххутун ырытан, ырыҥалаан көрүөххүт, тыын ылыаххыт. Сылгыт улахан түһүүтэ-тахсыыта, уларыйыыта-тэлэрийиитэ суох буолуо, биир күдьүстүк ааһыа. Арай эргинэр, барыстаах дьыалаҕа ылсар, харчыны өлөрөр дьоҕургут уһуктуо. Сүүйүүлээх оонньууга аһара үлүһүйбэккэ сөбүгэр кыттыҥ. Тапталлааххытыгар сыһыаҥҥытын уларытыҥ. Сорох ардыгар олус элбэҕи ирдиигит, сир саара эһиги тула эргийиэхтээҕин курдук саныыгыт. Тугу сөбүлээбэккитин искитигэр муспакка, тута этиҥ. Төһөнөн өр тутаҕыт да, соччонон ыарыылаахтык тахсар. Олоххутугар тыын суолталаах боппуруоһу соҕотоҕун быһаарартан туттунуҥ. Чугас дьоҥҥут, атастаргыт көмөлөһөргө мэлдьи бэлэмнэр. Дьиэ кэргэҥҥэ эбиллии күүтэр.

ЫЙААҺЫН

(балаҕан ыйын 24 к. – алтынньы 23 к.)

Айыах-тутуох баҕаҕыт күүһүрэр. Саас, сайын иэйии сыккыс уутун курдук устан киирэ турар. “Бачча ыксал кэмҥэ тугун эмиэ иэйиитэй?” диэмэҥ. Ити иэйии эһиэхэ үлэҕитигэр, дьиэ кэргэҥҥитигэр үчүгэй өттүнэн дьайыа. Сулустар үүнэр сылга хамнас үрдүүрүн эрэннэрэллэр, үлэҕэ тахсыы баар буолуон, дуоһунаскыт үрдүөн сөп диэн этэллэр. Доруобуйа өттүгэр кыра кыһалҕа кыһарыйыа эрээри, кэмигэр тута быһаарыаххыт. Уһун кэмҥэ буулаабыт дьарҕа ыарыылаахтар аматыйан барыаххыт. Уопсайынан, сыл устата сэниэлээх, күүстээх-уохтаах буолуоххут. Эниэргийэҕитин үлэҕэ-үөрэххэ анааҥ: дьиэҕитин өрөмүөннээҥ, эбии кууруска үөрэниҥ, сайынын-күһүнүн сир астааҥ, оттооҥ-мастааҥ. Улаханы атыылаһыаххыт иннинэ, холобур, кыбартыыраны, тимир көлөнү, үчүгэйдик ырытан толкуйдааҥ. Ыраах айантан туттунаргыт ордук: үөйбэтэх өттүттэн улахан ороскуот тахсыан сөп. От ыйыгар, атырдьах ыйыгар таптал кутаа уотугар умайыаххыт.

СКОРПИОН

(алтынньы 23 к. – сэтинньи 21 к.)

Сэрэйэн көрөр дьоҕургут (интуицияҕыт) хаһааҥҥытааҕар да сайдар, күүһүрэр сыла. Интуицияҕытынан салайтарыҥ: үбү-харчыны булуоххут, үлүннэриэххит. Ааһан эрэр сылга тус олоххутугар кыһалҕалар үөскээбит эбит буоллахтарына, ону эмиэ улахан уустуга суох быһаарыаххыт. Үлэҕитинэн даҕаны, сынньалаҥҥытыгар даҕаны үгүстүк айанныаххыт. Ол эһиэхэ күүс-уох эбиэ. Кэлиҥҥи сылларга күһүн мэлдьи санааҕыт түһэр, тугу да гыммакка сытыаххытын эрэ баҕарар эбит буоллаххытына, быйыл "күһүҥҥү хандра" диэни билиэххит суоҕа, мэлдьи атаххыт үрдүгэр сүүрэ-көтө сылдьыаххыт. Кыыһырдаххытына, арааһы саҥарыаххытын сөп эбит. Саҥа сылга оннук тыллаһаргытын тохтотуҥ. Хата, ол оннугар махтал тылын элбэхтик этиҥ. Таптал чааһыгар биир тэҥ: ыал буолар да, арахсар да түгэн кэмчи буолуо.

ОХЧУТ

(сэтинньи 22 к. – ахсынньы 21 к.)

Охчуттары үлэҕэ-үөрэххэ, сыһыаҥҥа холку сыл күүтэр. Ол эрээри кинилэр бэйэлэрэ "сылбыт аһара бытааннык баран иһэр" дии санаан, үөйбэтэх өттүттэн соһуччу быһаарыныахтарын сөп. Үлэҕитигэр да, тус олоххутугар да наҕыллык, эмоцияҕытын кыана туттан сыһыаннастаххытына, сыл бүтүүтүгэр табыллыы күүтэр. Хараххыт сөбүлүү көрөр киһитигэр истиҥ иэйиигитин кистии сатыыгыт да, ол сүүскүтүгэр сурулла сылдьар. Таптал чааһыгар аһаҕас, сайаҕас буолуҥ. Хойутуур кэмэлдьилээх эбиккит. Сыл хаһаайына хойутууру сөбүлээбэт, онон бириэмэҕитин көрүнэ сылдьыҥ, хойутаан-тардыллан элбэҕи сүүйтэриэххитин сөп. Кыра аайы ыксаамаҥ, кыыһырымаҥ. Барыта бэйэҕиттэн тутулуктааҕын өйдөөҥ.

ЧУБУКУ

(ахсынньы 22 к. – тохсунньу 20 к.)

Тулуурдаах уонна сыалгытын ыһыктыбат буоллаххытына, үүнэр сылга "хайаны да эргитиэххитин" сөп. Ол туһугар сыл хаһаайына эһигиттэн тулууру, күүстээх санааны уонна элбэх үлэни эрэйэр. Оттон биир сиргэ лигиччи олороллорун сөбүлүүр Чубукулар тугу да ситиһиэ суохтара, хармааннара сыл устата хаптаҕай буолуоҕа. Соҕотох дьону элбэх билсиһии күүтэр. Ол эрээри быстах таптал, сыһыан угаайытыгар киирэн биэримэҥ, албыннатыаххытын сөп. Оттон өр билсибиттэр ыал буолалларыгар, оҕо-уруу төрөтөллөрүгэр табыгастаах сыл. Тохсунньу, олунньу ыйдарга эппиэттээх быһаарыныыны ылыаххыт. Ол быһаарыныыгыт түмүгэ сылы эргиччи сабыдыаллыа. Муус устартан атырдьах ыйыгар диэри соһуччу түгэн тосхойуо. Холобур, атын сиргэ көһүү, ыраах айан, сыаналаах бэлэҕи тутуу, нэһилиэстибэҕэ тиксии. Оҕус сылыгар элбэххэ үөрэниэххит, бэйэҕитигэр эрэлгит хайа да сыллааҕар күүһүрүө.