Сэтинньи 30 күнүгэр ИДьМ эргэ дьиэтигэр интернет сайт эрэдээктэрдэрин, «кэпсэтэр сирдээх» блогердары кытары быраабы араҥаччылыыр уорганнар үлэһиттэрэ көрсүстүлэр. Быыбар иннинэ араас сурах-садьык, «экстремизмнии» санаалаах ыҥырыылар тахсыахтара диэн эрдэ сэрэхэдийэн прокуратура уонна Экстремизмы утары охсуһар киин үлэһиттэрэ  бу көрсүһүүнү тэрийбиттэр

ЭУОК салайааччыта Сергей Пономарев Арассыыйаҕа 7600 экстремизмныы санаалаах сайтар бааллар диэн этэр. Бу сайтар куһаҕан дьаллыктарыгар ыччаты угуйаллар, «вербовкалыыллар» диир. Нерюнгрига эктсремизмҥа күтүрэнэн 6 холуобунай дьыала тэриллибитин этэр.

Дьиҥинэн, «экстремизм» суолтата сүрдээх халбархай. РФ быраабын араҥаччылыыр систиэмэтигэр «экстремизм» диэн тиэримин  Шанхай конвенциятыгар («О борьбе с терроризмом, сепаратизмом и экстремизмом») илии баттаныаҕыттан – 2001 сылтан киирбитэ. Ити кэнниттэн сөбүлээбэтэх киһигин хайа талбыт «экстремизмҥэ» буруйдуохха сөбө. Прокуратура үлэһитэ Александр Иванов «бу тыл суолтата 2011 сыл сайыныттан арыый чопчуламмытын» этэр. РФ Үрдүкү суутун пленума бэс ыйын 28 күнүнээҕи 11 нүөмэрдээх быһаарыытынан өйдөбүл балайда «кыараабыт».

Саха сирэ атын омуктарга, итэҕэллэргэ тулуурдаахтык сыһыаннаһар. Ол гынан баран былыр-былыргыттан Сэбиэскэй былаас олохтонуоҕуттан норуоппут чулуу уолаттарын былааһы, систиэмэни  «утары турааччыларга» күтүрээн, араастаан дьаралыктаан репрессийэлээбиттэрэ элбэх.  Ол иһин бу уочараттаах кутталлаах тылтан - «экстремизмтэн» дьулайабыт. Сэрэнэ-сэрбэнэ сыһыаннаһабыт.

Ыам ыйын 11 күнүнээҕи миитин кэнниттэн биир уол уорганнарга сыһылла-соһулла сылдьарын билэбит. Кини дьыалатын ЭУОК салайааччыта «тохтотуллара буолуо, холуобунай дьыала көбүтүллүбэтэҕэ, силиэстийэлэнэ эрэ сылдьар» диэн быһаарар. Видеокадрга киирбит ыччаты биирдиилээн ыҥыртаан доппуруостаабыттара биллэр. Ону Пономарев «барыларын буолбатах, кими билбиппитин эрэ ыҥырталаабыппыт» диир.

Дмитрий Медведев Аллараа Бэстээххэ кэлэ сырыттаҕына, олохтоох киһи «экстремизмныы санаалаах» үс устуука листовка суруйан тарҕата сатаабытын кэпсээтилэр. Листовка ис хоһооно дьиҥнээхтик «былааһы түөрэҥнэппитин-түөрэҥнэппэтэҕин» лингвистика эспэртиизэтэ быһаара сылдьар диэн буолла. Бу сордоох элбэҕи тарҕатыахтааҕын хата уорганнар тута билэн харытыттан харбаабыттар.

Төннөн кэлэн ыам ыйынааҕы миитиммитигэр аҕыннахха, ити айдаан профессор Павел Казарян Манчаарыны күлүү-элэк гыммытыттан, «сахалары муусукаҕа эрмээннэр үөрэппиттэрэ» диэн дойҕоҕуттан саҕаламмыта. Кини «нүөлсүппүт өҥ  буоругар» Нерсисян дьыалата тилэри тэбэн тахсыбыта. Дьиҥинэн өрөспүүбүлүкэҕэ  кыыһы күүһүлээһин эрдэ да баар буоллаҕа. Хомойуох иһин, быраабы араҥаччылыыр уоргаттар «Казарян суруйууларын» туһунан букатын да билбэт дьоммут диэтилэр. Дьикти. Ити айылаах интернети биир гына тарҕаммыт, сыһылла-соһулла сылдьан дьону кыынньаабыт үөҕүүнү харахтарын далын таһыгар туппуттара сүрдээх. Дьиҥ иһигэр киирдэххэ  дьиҥнээх экстремизмныы санаалаах диэн кинини  ааттыахха сөбө. Уорганнар суруналыыстары Казарян суруйууларын кытары билсиһиннэрэллэригэр көрдөстүлэр. Итинник үөҕүүнү биллигит да тута биллэриҥ, сайткытыттан сотон иһиҥ диэн сүбэлээтилэр.

Уонна оттон түмүккэ өссө биирдэ хатылаан быыбар күн агитацияны таһаарымаҥ, араас санааны соҥноомоҥ диэн буолла.