Бүлүү улууһуттан сылдьар 24 саастаах эр киһи түргэн үлүгэрдик байарга санаммыт. Кытай ырыынагар ойон тиийэн элбэх күлүүс, быраас халаатын уонна ыарыһаҕы иһиллиир фонендоскоп атыыласпыт. Биллэрии биэрэр куорат хаһыатыгар суһаллык уонна чэпчэкитик дьиэ куортамныыбын диэн биллэрии биэрбит.  Куортам  кыһалҕалаах, дьиэҕэ-уокка  баҕалаах биһиги куораппытыгар  элбэх бөҕө буоллаҕа дии.

Биллэриигэ эрийэн тиийэн  кэлбит дьону  республиканскай балыыһаҕа эбэтэр Медкииҥҥэ көрсүөххэ диэн эр бэрдэ болдьуур эбит. Кэлбит дьону кытары бэрт тиэтэллээхтик, бириэмэтэ, бокуойа суох ыксыы сылдьар быраас курдук кэпсэтэн дьон итэҕэлин тута ылбыт. Бырааһыгар эбии өссө сахата ордук итэҕэтиилээх буолбут. Албыннаппыт дьон үксэ: «Кини быраас уонна бэйэбит киһибит – саха уола»,- диэн этэллэр. Нэһиилэ дьиэ «күлүүһүн» биэрэн баран, солуок харчы  хаалларар эбит. Күлүүс ылбыт дьон үөрэн-көтөн, куортамнаабыт квартираларыгар кэлбиттэрэ… дьиэ дьиҥнээх хаһаайыттара кинилэри көрсөллөр… Салгыытын бэйэҕит хараххытыгар оҥорон көрүҥ. Инньэ гынан «бырааспыт» уонча дьахтары 120 тыһ. тахса суумаҕа албыннаабыт. Аны туран өркөн өйбүт бырааһынан эрэ муҥурдамматах. Ас-үөл атыылыыр урбаан тэрилтэтин дириэктэрэ буолан кубулунан, биэс урбаанньыты сымыйа докумуоҥҥа баттатан, кинилэртэн 200 тыһыынчаттан тахса сууманы олордон ылбыт.  Бэрт халыҥ холуобунай дьыала матырыйааллара хомуллан, суукка утаарылынна. Бу туһунан СӨ ИДьМ силиэстийэлиир управлениятын пресс-сулууспата кэпсиир.