Айсен Николаев брифинг кэмигэр өрөспүүбүлүкэҕэ хоруона хамсыгын балаһыанньатын билиһиннэрдэ.
Ол курдук, суукка устатыгар 50 саҥа коронавирустаабыт киһи бигэргэммит: 41 – Дьокуускайга, маны таһынан Мииринэйгэ, Нерюнгрига уонна Амма улууһугар.
Билигин 31 киһи ыарахан туруктаах сытар, олортон аҕыс киһи ИВЛ аппараатыгар холбоммут. Хамсык халбарыйа илик, онон мааска эрэсиимин тутуһар булгуччулааҕын Ил Дархан өссө төгүл сэрэттэ.
Айсен Николаев:
-- Хас биирдиибит мааска эрэсиимин уонна социальнай дистанцияны тутуһуохтаахпыт. Өҥөнү оҥорор тэрилтэлэр үлэлэрин хонтуруолун күүһүрдүөх тустаахпыт. Биир эмэ кэһии баарын биллэххитинэн, хайаан даҕаны Роспотребнадзор уонна коронавируһу бохсор итии лииньийэлэргэ эрийэн биллэриҥ. Бүгүҥҥэттэн СКЭни туттарыы саҕаланна. Бастакы күн туох да кыһалҕата суох этэҥҥэ ааста. Выпускниктар эксээмэн кэмигэр чөл буолар наадатыттан, бука баһаалыста бэйэ изоляциятын тутуһуҥ. Быйыл үөрэххэ туттарсааччылар 086 ыспыраапканы биэрбэттэр, Мэдэссиинэ тэрилтэлэригэр былааннаммыт мэдэссиинэ көрүүлэрэ ыытыллыбаттар. Хамсыкпыт ону оҥорорго көҥүллүү илик. Уопсайынан, балаһыанньабыт син ама. Эрдэ сылыктаабыппыт курдук, ыарыыбыт сууккаҕа 40-50 киһиннэн турар, ол кэннэ намтыа диэн эрэнэбит.
Оперативнай штабка иһитиннэрбиттэринэн, ааспыт суукка устатыгар эбииикки киһи бу ыарыыттан өлбүт. Кинилэр 65 саастарын ааспыт. Хроническэй ыарыылаах дьон.
Уопсайа хамсык кэмигэр 4365 киһи сутуллубут, 40 киһи өлбүт.
