Дойду сүрүн санитарнай бырааһа Анна Попова быһаарыытынан, Саха сиринээҕи Роспотребнадзор анаалыһы миэстэтигэр бигэргэтэр бырааптанна. Бу туһунан Ил Дархан сарсыардааҥҥы брифинг кэмигэр эттэ.
“Инньэ гынан, бэҕэһээҥҥи үс коронавирустаах киһи анаалыһын Новосибирскайдааҕы “Вектор” лабораториятын бигэргэтиитин кэтэһиннэрбэккэ, официальнай ыстатыыстыкаҕа киллэрдибит”, - диэтэ Айсен Сергеевич.
Ленскэйгэ оперативнай штаб сөпкө дьаһанан үлэлиирин Ил Дархан бэлиэтээтэ. Онно ыалдьыбыт киһи алтыспыт дьонун быһааран, анаалыстары ылбыттар. Оттон Алдаҥҥа балаһыанньа арыый уустук соҕус. Киргизияттан сыдьааннаах, Арассыыйа гражданстволаах, Москубаттан көтөн кэлбит кэргэнниилэр ыалдьыбыттар. Кинилэр кимнээхтиин алтыспыттарын ирдиир үлэ ыытыллар. Төһө да этиллибитин үрдүнэн, кэргэнниилэриттэн биирдэстэрэ дьиэҕэ хааллан сыппакка, үлэтигэр — киин ырыынакка сылдьыбыта биллибит. Онон алтыспыт дьон улаатан тахсар чинчилээх. Ил Дархан “Алдаҥҥа билиҥҥээҥи дылы ырыынактарын да саба иликтэр” диэн саанна.
Айсен Николаев Саха сирин олохтоохторугар туһаайан “харантыын кэмигэр дьиэҕэ тулуйан олоро түһүҥ, биһиэхэ коронавирус булулла илик, онон сылдьыһыахха сөп диэн сыыһа санаамаҥ” диэн эттэ.