2020 сылга уопсайа 25,97 км усталаах суол 22 эбийиэгэ оҥоһуллара былааннанар. Бу туһунан Дьокуускай куорат дьаһалтатын пресс-сулууспата иһитиннэрэр.
БКАД национальнай бырайыак чэрчитинэн суолу оҥорууга үбүлээһин былааннаммыт кээмэйэ 1,5 млрд солк тэҥнэһэр.
Куораттааҕы суол салалтатын көрдөрүүтүнэн, ааспыт сылга Дьокуускайга суол 19 эбийиэгэр тутуу, хапытаалынай өрөмүөн үлэтэ ыытыллыбыт. Уопсай устата – 25,8 км. Ол курдук, 13 уулуссаҕа хапытаалынай өрөмүөн ыытыллыбыт. Мархинка, Шестаковка, Севернай түөлбэҕэ үрэхтэри туоруур күргэлэр тутуллубуттар. Ону таһынан, Севернай түөлбэҕэ киирэр (подъезднай) суол тутуллубут уонна Ларионов, Суорун Омоллоон аатынан уулуссалар оҥоһуллубуттар.
Дьокуускай куорат таһынааҕы суолларга эмиэ өрөмүөн үлэтэ ыытыллыбыт. Ол курдук, Кангалааска, Маҥаҥҥа бөһүөлэк иһинээҕи суоллар, Мархаҕа 60 суол эбийиэгэр, Хатаска уопсайа 6 км усталаах суол өрөмүөннэммит. Оттон Табаҕаҕа суолга баар дьаамалар уонна “лежачай полицейскайдар” оҥоһуллубуттар.
Дьокуускайга тоҕус оскуола уонна биэс светофор аттыгар сатыы сылдьар дьон суолу туоруур сирдэрэ саҥардыллан оҥоһуллубут. Уопсайа 23 679,1 кв м иэннээх суол дьаамалара оҥоһуллубуттар. Суол учаастактарынан 4700 кв м иэннээх аспаал саҥардыллыбыт. Ол курдук, “Борисовка 2” учаастагар 2800 кв м уонна Автодорожнай уулуссаҕа 1600 кв м иэннээх сиргэ үлэ ыытыллыбыт.