Ханна да буоларын курдук, кыстыгы туорааһын, дьиэ-уот туруга саамай “ыалдьар” боппуруоспут буолар. Мииринэйгэ 1978 сыллаахха тутуллубут хочуолунай, 16 теплопуун баар.
МПЖХ диэн ДЬХХ сүрүн тэрилтэтэ 420 дьиэни сылааһынан хааччыйар. Кэнники сылларга бу теплопууннартан иккитэ эрэ уларытылынна, атыттара эргэлэр. Быйыл куорат устатын-туоратын тухары, үс биэрэстэ усталаах уу уонна ититии утумнара аанньа өрөмүөннэммэтилэр. ДЬХХ туруга курдук сытыы боппуруоска дьон туох санаалаах-оноолоох эбитий?
А.Тимофеева: МПЖХ, “Коммунальщик” диэн ДЬХХ тэрилтэлэрдээхпит. МПЖХ аны уоту төлөөһүн боломуочуйатын ылла. Энергосбыкка уоту төлөөбөппүт, кып-кыараҕас РКЦ-га уочараттыахпыт. Онтон сылтаан “хааһыланыы” буолуо диэн куттанабын. Быйыл МПЖХ бөҕү-саҕы тиэйиигэ эрэгэйиэн эпэрээтэрэ буолбута эрээри, күттүөннээх уларыйыыны, сайдыыны көрө иликпит. Мантан инньэ баҕар сайдыахтара.
М.Гиниятуллина: Дьиэ иһин төлөбүр сиэрэ суох улахан. Икки хостоох, 53 кв.м иэннээх таас дьиэҕэ, итии-тымныы ууну кэмниир учуоччуктардаах олорон уонтан тахса тыһыынчаны төлүүбүт. Аны олорор дьиэни араас күүтүллүбэтэх быһылааннартан страховкалааһын төлөбүр былааҥкатыгар киириэ диэн дьон сэрэтэр.
А.Садыков: Мин Комсомольскай уулусса арҕаа өттүгэр олоробун. Ырааhырдыы чааhыгар дьыала мөлтөх. Бөҕү-саҕы быысаhалыы олоробут. Олохтоох былаастар куорат кытыытын болҕомтоҕо ылаллара буоллар диэн эрэллээхпин.
А.Якимова: Ленинград бэрэспиэгэр саамай кытыы “хрущевка” дьиэҕэ олоробун. Быйыл Мииринэй хас да элбэх кыбартыыралаах дьиэтин кырааскалаатылар. Хаар өлгөмнүк түһэр, тымныы саҕаламмыт кэмигэр кырааскалаабыттара туох аанньа хааччыстыбалаах буолуоҕай? Ленинград бэрэспиэгиттэн биһиги эрэ дьиэбитин кырааскалаабатылар. Өрөмүөннээччилэр хойутаан хаалбыттар үһү. Дьиэбит анна кыhын, саас лаhыр муус буолар. Турбалартан уhун кыhыны быhа уу саккырыыр. Дьиэттэн тахсааккын кытары килэччи муус буолааччы. Бары мантан олус эрэйдэнэбит. Хомунаалынай систиэмэбит бөрүкүтэ суох. Барыта тохто, тэстэ турар.
В.Торопова: Мас дьиэҕэ олорбутум сүүрбэччэ сыл буолла. Дьиэбит акылаатын сытыйбыт диэбиттэрэ ыраатта. Онон тулааһыммыт бокуйан, дьиэбит тиэрэ хаадьайан турар. Улахан эрэйинэн самнархай дьиэлэр испииhэктэригэр киллэртэрбиппит. Таас дьиэҕэ көһүөхтээхпит. Ону кyyтэбит.
И.Синицына: Мииринэй кэлин сүрдээҕин “дьүдэйдэ”. Туох баар ититиитин, уутун-хаарын утумнара мөлтөөтүлэр. Быйылгы кыстыгы этэҥҥэ туоруурбут буоллар диэн баҕа санаалаахпын. ДЬХХ букатын сайдыбат. Дьэ, дьикти. Алмаас-ньиэп, гаас бырамыысалынастаах сиригэр олорорбут соччо көстүбэт.
Б.Митыпов: Иркутскай уобаластан кэлбитим сыл буолла. Хомунаалынай өҥөлөр, уот ыараханыттан салынным. Бэйэтэ ГЭС-тээх сир диэтэххэ, туох да чэпчэтиитэ суох эбит. Оттон ДЬХХ чааһыгар ханна баҕар хааччыйыы маннык.
Станислав Алексеев, Мииринэй куорат. Ааптар хаартыскалара.