Кириэстээх дьаһалтата дьон кыһалҕатын учуоттаан поруом үлэтин алтынньы 25 күнүгэр диэри уһатарга көҥүл биэрдилэр.
Даҕатан эттэххэ, урут поруом сырыыта эрдэ уолдьаһара, холобур, 17-19 чыыһылаларга номнуо бүтэрэ. Билигин икки поруом сылдьаллар. Оттон Оччугуй Ботуобуйаҕа турар МУАД понтуонун Дьокуускай суруналыыстара, өссө алтынньы 8 күнүгэр хомулунна диэн биллэрбиттэрэ. Күн бүгүнүгэр диэри МУАД понтуона туһалыы, үлэлии турар. Күргэ тутааччы “ВССМ” ХЭТ понтуона суох сатаммат диэн буолбут. Онтон, Оччугуй Ботуобуйаҕа уу сүрдээҕин кэлбит, кыдьымахтаабыт. Муустаах уу понтуон үрдүнэн саба дьалкыйыа диэн, муостаны тутааччылар тилэри таастаах буор куппуттар. Онон, Мииринэйтэн Кириэстээххэ диэри поруом, понтуон бааллар. Массыыналар туоруулларыгар күн бүгүн харгыс суох. Алтынньы 25 күнүгэр диэри айанныахтарын сөп. Сунтаарга диэри таксыы сыаната – 2.000 cолк. “Индрайвер” таксыыта эмиэ сылдьар эбит. Ол эрэн, Сахабыт сирин айылҕата тыйыс, эмискэ тымныйан араас түгэн үөскүөн сөп. Ону учуоттааҥ.
Станислав Алексеев, Мииринэй куората. Ааптар хаартыската.
