Балаҕан ыйын 21 күнүгэр Уус Алдан улууһун Суотту нэһилиэгин олохтоох ааптара, норуот тыйаатырын артыыһа, “Дьээбэрэҥ” өрөспүүбүлүкэтээҕи күрэс тоҕус төгүллээх “Бастыҥ ааптардара” уонна икки төгүллээх “Гран При” хаһаайына, уус-уран литература эйгэтигэр ыытыллар үгүс күрэстэр кыайыылааҕа Иннокентий Петрович Попов – Оҕуруоттаах 60 сааһынан, Саха сирин суруйааччыларын сойууһугар киирбит улахан ситиһиитинэн, “Тайҕа таайыллыбатах таптала” диэн Надежда Егорова – Намылыны кытта суруйбут ураты кинигэлэрин сүрэхтэниитигэр аналлаах, “Айаным айар аартыгынан” диэн айар киэһэлэрэ буолан ааста.
Уус -уран литература дьоро киэһэтигэр суруйааччы, суруналыыс, “Далбар Хотун” сурунаал эрэдээктэрин солбуйааччы, СӨ
култууратын үтүөлээх үлэһитэ Галина Нельбисова, суруйааччы, суруналыыс, “Саха сирэ” хаһыат кэрэспэндьиэнэ
Надежда Егорова – Намылы уонна олохтоохтор кыттыыны ыллылар.
Ааптар Иннокентий Попов суруйууларыгар Тумуллааҕы “Айыллан” норуот тыйаатыра “Санаторийга” кэмиэдьийэтин, Суоттутааҕы култуура киин артыыската Марфа Аржакова “Айылҕаҕа” монолуоктарын, Ин Попов уонна П. Черкашин “Булт абылаҥа” диалогтарын көрөөччүлэр олус биһирээтилэр. “Түмсүү” сынньалаҥ киинин кэллэктиибин аатыттан 12 туомнаах, сахалыы сурук-бичик быһаарыылаах тылдьытын туттардылар.
Тэрээһиҥҥэ мустубут дьон дохсун ытыс тыаһын бэлэхтээтилэр, ааптарга алгыс тылларын эттилэр.
