От ыйын 2 күнүгэр Амма улууһун Бөтүҥ нэһилиэгэр саҥа успуорт саалата аһыллыа. Манна адаптивнай успуорт көрүҥнэригэр күрэстэһиилэри ыытыахха сөп.
Бөтүҥ нэһилиэгин баһылыга Саргылана Борисова үөрүүтүн маннык үллэстэр: “Успуорт саалланаммыт олохтоохтор саамай улахан ыра санаабыт туолла. Бу түгэни олус өр күүппүппүт. Былаан быһыытынан ааспыт сыллаахха аһыллыахтаах этэ. Ону оонньуулар ыытыллар күнэ-дьыла көһөн биэрэн, үбүлээһин тохтоон хаалбыта. Ааспыт сыл от ыйыгар Ил Дархан Айсен Николаев биһиги нэһилиэкпитигэр кэлэ сылдьан, эбийиэги түмүктүүр туһунан сорудах биэрбитэ. 130 мөл солк суумалаах үбүлээһини “Алроса”хампаанньа уйуммута. Инньэ гынан, олохтоохтор махталбыт муҥура суох”.
Бэдэрээтчит “Дирекция по строительству”, суббэдэрээтчит “Электромонтаж” тэрилтэлэр буолаллар.
Бөтүҥ нэһилиэгэр доруобуйаларыгар хааччахтаах дьон реабилитационнай киинэ баар. Инньэ гынан, манна саҥа успуорт саалата тутуллубута мээнэҕэ буолбатах. Бастакы этээһигэр волейболлуур, баскетболлуур уонна эрчиллэр сааллар бааллар. Оттон иккис этээһигэр тустар саалалаах. Доруобуйаларыгар хааччахтаах дьон туох да кыһалҕата суох сылдьалларыгар анаан бары өттүнэн хааччыллыбыт. Ол курдук, пандустар, тутуһардар, лифт баар. Ону таһынан, аналлаах киирэн тахсар, суунар сирдээх.
Саргылана Борисова кэпсээбитинэн, эргэ саал 2015 сыллаахха көтүрүллүбүт. Олохтоохтор кулууп дьиэтигэр, уулуссаҕа дьарыктана сылдьыбыттар. Оҕолору физкультура уруогар ыаллыы сытар Чапчылҕан нэһилиэгэр оптуобуһунан таһа сылдьыбыттар.
“Нэһилиэнньэбит ахсаана 1270 киһилээх. РФ уонна Саха сирин успуордун 18 маастара баар. Биир дойдулаахтарбыт ситиһиилэрин киэн туттабыт. Ол курдук, Владимир Егоров норуоттар икки ардыларынааҕы кылаастаах успуорт маастара буолар. Тустууга Европа чемпионатын боруонса мэтээлин хаһаайына, билигин Македония аатыттан кыттар. Уолбут Олимпиадаҕа тиийиэ диэммит эрэнэбит. Чэпчэки атлетика спортсменнара Михаил Жарин, Належда Бут эмиэ Бөтүҥтэн төрүттээхтэр”, – диэн баһылык киэн тутта кэпсиир.
Саҥа успуорт саалыгар ДЮСШ адаптивнай волейболга, чэпчэки атлетикаҕа уонна тустууга Амматааҕы салаата аһыллыахтаах. Адаптивнай волейболга Арассыыйа успуордун маастара Никита Лобанов, тустууга успуорт маастара Петр Егоров тренеринэн үлэлиэхтэрэ.
Балаҕан ыйын 1 күнүттэн Бөтүҥҥэ саҥа оскуола аһыллан үлэлиэхтээх. Онон олохтоохтор үөрүүлэрэ муҥура суох.