Мииринэй оройуонун Таас-Үрэх дэриэбинэтэ Усть-Куттуур суол таһыгар баар. Суол ойоҕоһугар Усть-Кут диэки сыбыытыыр, төннөр суоппардар кэтэмэҕэйдээбэккэ бөхтөрүн ыһаллар-тоҕоллор. Бу – мөкү экологическай быһыы-майгы сатарыйыытын төрдө буолбута хомолтолоох.
Айан суолун ойоҕоһунан, сыккыстарынан, ойуур дьаппа сирдэринэн бөхтөөх уу Таас-Үрэххэ суккуллар. Ньиирээйи талахтар, мас-от оргулга көмүлүннүлэр. Ааһааччы суоппардар бөхтөрө элбэҕин, бу бэрээдэги тутуспаттара кыһыытын-абатын! Бу Таас-Үрэх олохтоохторо ыыппыт хаартыскаларгар, Айылҕаны харыстыыр сокуону куруубайдык кэһии (Арассыыйа холуобунай кодексатын 250-с ыстатыйата) ырылыччы көстөр. Ким да кыайан тиийэн көрбөтүнэн-истибэтинэн, хонтуруол ситэтэ суоҕунан туһаммыттар. Суол кытыытын бүтэтэ суох оргул гыммыттар. Бу – Арассыыйа Ууну харыстыыр сокуонун (Водный кодекс) пууннарын толоостук кэһии.
Бүтүн нэһилиэк иһэр уутун ылар үрэҕин киртиппиттэригэр туһааннаах сыанабыл, дьарыйыы бэриллиэхтээх. Маннык нэгэй кэһиини кыраҕы харахтаах кэтэбил уорганнар тоҕо тутатына көрбөттөрүй? Бастатан туран, Мииринэй оройуонун Айылҕаны харыстыыр кэмитиэтин өттүттэн туһааннаах миэрэ ылыллыахтаах этэ. Таас-Үрэхтэр хаарыан үрэхтэрин хайдах кэбилээбиттэрин көрөн киһи хараастар.
Өссө төгүл төхтөрүйэн этэбин, бу Арассыыйа Айылҕаны харыстыыр сокуонун уонна Уу кодексын (Водный кодекс Российской Федерации) билиммэккэ, көҥүл-босхо барааһын буолар. Маны Саха сирин Айылҕаны харыстыыр министиэристибэтэ, Ил Дархан администрацията, бырабыыталыстыба уонна Ил Түмэн дьокутааттара болҕомтоҕо ылан бэрэбиэркэлииллэригэр баҕарабын.
Станислав Алексеев, Мииринэй куората.