Бэҕэһээ сарсыарда Турцияҕа уонна Сирияҕа сир хамсааһына буолбутун туһунан сурах аан дойдуну тилийэ көппүтэ. Оттон киэһэ бу икки дойдуга өтөрүнэн буолбатах улахан иэннээх уонна күүстээх сир хамсааһына буолан, хас эмэ сүүһүнэн киһи өлбүтүн уонна өлө турарын туһунан сонуннар бар дьону аймаабыттара.
Кэнники дааннайынан, Турцияҕа 2379 киһи өлбүт, 14 483 киһи эчэйбит. Сирияҕа 711 киһи өлбүт, 1431 киһи эчэйбит. Маны таһынан Дамаск бас билиитигэр киирбэт оройуоннарга 733 киһи өллө, 2,1 тыһ. киһи эчэйдэ диэн суруйаллар. Саамай улаханнык Газиантеп (үс гыммыт биирэ эрэ хаалбыт), Кахраманмараш, Хатай, Османие, Адыяман, Малатья, Шанлыурфа, Адана, Диярбакыр уонна Килис куораттар эмсэҕэлээбиттэр. Оттон Сирияҕа - Алеппо, Идлиб, Латакия уонна Хама провинциялар.
Хамсааһын магнитудата араас оройуоннарга Рихтер шкалатынан 3,9 саҕалаан 7,8 диэри күүстээх эбит. ООН гуманитарнай боппуруостары сүрүннүүр управлениетын дааннайынан, Турцияҕа бастакы уонна иккис хамсааһын икки ардыгар 78 хамсааһын буолбут. Турциятааҕы сир хамсааһынын долгуна Ливаҥҥа, Иракка, Израильга, Грузияҕа, Абхазияҕа, Арменияҕа, Кипрга, оннооҕор Сочига биллибит. Казахстаҥҥа эмиэ кыра хамсааһын буолла диэн суруйаллар.
Бэрэсидьиэн Реджеп Эрдоган иһитиннэриитинэн, Турцияҕа 45 дойду көмөлөһөр баҕалааҕын биллэрбит, бастатан туран, Арассыыйа бэрэсидьиэнэ Владимир Путин. Ол курдук, Евросоюз уонна онно киирэр Франция, Польша, Чехия, Испания быһааччылара көппүттэр, Японияттан сейсмологтар үлэлии тиийбиттэр. Великобритания, Иран, Сербия, Швеция, США, Индия, Кытай уонна Швейцария эмиэ туора турбатахтар. Оннооҕор Турцияны кытта соччо бэрдэ суох сыһыаннаах Греция уонна Кипр, ону сэргэ уустук быһыыга-майгыга олорор Украина көмөлөһөргө тылламмыттар.
Урусхалламмыт дьиэлэр анныларыттан 7500 кэриҥэ киһини быыһаабыттар. Олор истэригэр, дьолго, тыыннаах хаалбыт, ардыгар эчэйбэтэх да оҕолор бааллар. Сирияҕа биир дьахтар урусхалламмыт дьиэ анныгар төрөөбүт. Бэйэтэ быстаахтаабыт, оҕотун быыһаабыттар. Сейсмологтар сир хамсааһына өссө хас да күн салҕаныа диэн сабаҕалыыллар. Турцияҕа олунньу 12 күнүгэр диэри траур биллэрилиннэ.
Сонун төрдө: Киин таһаарыылар матырыйааллара
Хаартыска: https://www.kommersant.ru
