Арассыыйаҕа педофилия долгуна

26.09.2013 14:45 | Автор: Туйаара Сиккиэр | Көрдүлэр: 3060   
Печать
668_copy_copy_copyАндрей Малахов “Пусть говорят” биэриитигэр оҕолорбутун көрбөккө педофиллар илиилэригэр уган биэрэрбитинэн, төбөбүт оройунан арыгыга убаммыппытынан, быстар дьадаҥы олохпутунан-дьаһахпытынан, сотору-сотору маннык ыар буруй тахсарынан, ИДьМ сүгүн-саҕын үлэлээбэтинэн, оһуобай “криминогеннай” эрэгийиэн буоларбытынан бүтүн Арассыыйаҕа аатырдыбыт. Кыбыстыыта сүрдээх.
 Пилипенко буруйдаах – дакаастанна!

Москубаттан кэлбит силиэстийэ үлэһиттэрэ дьыаланы хат чинчийдилэр. 52 киһини доппуруостаабыттар, быһылаан буолбут кыбартыыратын, дьиэтин, түөлбэтин сыныйан көрбүттэр. Ону ааһан, икки полиграфологическай чинчийии оҥоһуллубут, туоһулар көрдөрүүлэрэ барыта бэрэбиэркэлэммит.

Андрей Малахов биэриитигэр Пилипенко төһө да ийэтин ыга кууһан туран уоскута сатаатар, биирдэрэ уолун көмүскээн төһө да ытаатар-соҥоотор, бу киһи чахчы буруйдааҕа толору дакаастанна! Ол курдук, балаҕан ыйын 24 күнүгэр эспэртиисэ түмүгүнэн, кыракый кыысчааҥҥа бу баҕайы спермата баара эбит. Оттон икки уорбаланааччы киэнэ суох диэн буолбут.

Пилипенко “урут икки ойоҕун оҕолорун эмиэ күүһүлээбит үһү” диэн сурах баара. Силиэдэбэтэллэр бу сураҕы эмиэ бэрэбиэркэлээбиттэр, үөрэтэн-ырытан көрбүттэр. Ол түмүгэр туох да оннук сибики көстүбэтэх. Оччотугар сурах сымыйа буолан тахсар.

Силиэстийэлиир кэмитиэт этэринэн, буруйдаах РФ ХК 131 ыст,  4 ч., “б” п. буруйданан 12 сылтан 20 сылга диэри хаайыллыан сөп. Ол аата, уопсастыбаннас туруорса сатыыр үрдүкү миэрэтэ буолуохтааҕар, бэл, олоҕун устата хаайыллар эбэтэр аттанар  накаастабыл көрүллүбэт буолан тахсар. Мантан инньэ силиэстийэбит ситэри тугу булан дакаастаабытын, оттон сууппут хайдах-туох бириигэбэри ааҕарын күүтэбит.

Педофиллар дойдулара?!

Хомойуох иһин, биһиги дойдубутугар маннык ыар буруйу оҥоруу кэнники сылларга сотору-сотору тахсар буолла. Киһи субуокканы ааҕа-ааҕа куһаҕан буолар. “Онно күүһүлээбиттэр, манна өлөрбүттэр...” Чахчы, оһуобай “криминогеннай” эрэгийиэҥҥэ кубулуйбуппут.

Киһи сөҕөрө диэн, атын эрэгийиэннэргэ тэҥнээн көрдөххө, ордук биһиги өрөспүүбүлүкэбитигэр оҕоҕо сыһыаннаан буруйу оҥоруу, күүһүлээһин, кырбааһын, өлөрүү элбэх эбит. Ол курдук, 66 саастаах биэнсийэлээх оҕонньор кыра кыргыттары “дьээбэлээбит”. Киниэхэ РФ ХК 132 ыст., 4 ч., “б” п. (сокуоннай саастарын ситэ илик оҕолорго сексуальнай дьайыылары оҥорбут), РФ ХК 135 ыст., 2 ч. холуобунай дьыала көбүтүлүннэ.

Бу балаҕан ыйын 1 күнүттэн 22 күнүгэр диэри 66 саастаах оҕонньор бэйэтин дьиэтигэр 11 уонна 13 саастаах кыргыттарга күүһүнэн сексуальнай дьайыылары оҥорбут. Өссө баран, сыгынньах оҕолор хаартыскаларын көрдөрбүт. Кыра оҕолору кытары таҕылын ханнара сатаабыт кырдьаҕаһы СИЗО-ҕа укпуттар. Бу холуобунай дьыаланы силиэстийэлии сылдьаллар.

Дьокуускайга 14 саастаах кыыһы дьиэ анныгар соскойдоспут киһини көрдүүллэр.  Балаҕан ыйын 16 күнүгэр Дьокуускай куорат Кузьмин аатынан уулуссаҕа турар дьиэ аттыгар, кимэ биллибэт эр киһи 14 саастаах кыыһы  харбаан ылан, дьиэ анныгар соспут уонна күүһүлүү сатаабыт.  Бу быһылаан күрүлүүр күнүс буолбут. Кыысчаан, хата, күүһүлэммэт быатыгар, педофил илиититтэн кыл мүччү куоппут.

Дьокуускайга атырдьах ыйын 10 күнүгэр чааһынай оптуобус суоппара 21 саастаах Жаныбай Т. (“Джонни” диэн хос аатынан биллэр кыргыыс) оптуобуһун иһигэр 13 саастаах кыыһы күүһүлээбит. Ол сарсыныгар Покровскай куорат олохтооҕо дьахтар: “Эрим 12 саастаах кыыспын күүһүлээтэ” диэн үҥсүү түһэрбит.

Икки сыллааҕыта Үөһээ Дьааҥы олохтооҕо 12 саастаах бэйэлээх бэйэтин кыыһын хаста даҕаны күүһүлээбит. Инньэ гынан, бу “аҕаҕа” РФ ХК 132 ыст., 4 ч., “б” п. (сексуальнай дьайыыны оҥорон) уорбаланан холуобунай дьыаланы көбүппүттэр. Силиэстийэ быһаарбытынан, бу баҕайы 2011 сыл алтынньытыттан ахсынньы ортотугар диэри “этиэҥ даҕаны өлөрүөм” диэн куттаан туран, көҥүл күүһүлүү сылдьыбыт.

Эмиэ бу сыл Өймөкөөн улууһун Уус Ньара бөһүөлэгэр  14 сааһын туола илик кыыһы күүһүлээһиҥҥэ буруйданар Б. баара-суоҕа 12 сылга хаайыллыбыт. Буруйдаах суукка буруйун билиммэтэх, күүһүлээһиҥҥэ туох да сыһыана суохпун диэн кэлиилии кэбэ турбут.

Эмиэ бу сыл 51 саастаах Дьокуускай куорат олохтооҕо үс саастаах кыыһын күүһүлээн тутуллубута. 2011 сыл сэтинньи 14 күнүгэр ити киһи итирик сылдьан, кырачаан оҕотугар таҕылын таһаарбыт. Кыысчаан, хата, аҕата баҕайы тугу гыммытын ийэтигэр кэпсээн биэрбит. Ийэ сонно тута полицияҕа тыллаабыт.

Аны оҕолор бэйэ-бэйэлэрин атаҕастыыллара, күүһүлүүллэрэ элбээбитэ эмиэ дьиксиннэрэр. Били, Дьокуускай таһынааҕы Марха бөһүөлэгэр оҕолор бииргэ үөрэнэр кыыстарын сыгынньахтаан баран атаҕастаабыттарын, ыт сааҕын сиэппиттэрин, Хаҥаласка (Кангалас) үрдүкү кылаас уолаттара оскуола туалетыгар сылы быһа кыра уолу күүһүлүү сылдьыбыттарын, Дьокуускай сонотуоруйугар  обургу уол кыра саастаах уолу күүһүлээбитин эмиэ ахтыахха сөп.

Аахпыккыт курдук буруйу оҥоруу биһиги дойдубутугар сотору-сотору тахсар. Өссө бу бэрт аҕыйах холобуру аҕаллыбыт. Аҥаардас быйыл саас чалбахтан көстүбүт “ыар булумньуну” санааҥ! Сайсары олохтооҕо итирик сылдьан алта саастаах кыыһын күүһүлээн, өлөрөн баран, суумка иһигэр уган чалбахха бырахпыта. Дьэ, ити курдук киһи өйүгэр батан киирбэт ыар быһылааннара буолуталыыллар.

Уһук Илиҥҥэ ордук сытыырхайбыт

Ама, биһиги эрэ дойдубутугар оҕолору итинник сордууллара буолуо дуо?! Интэриниэти сыныйан көрдөххө, Арассыыйа атын куораттарыгар эмиэ дөрүн-дөрүн маннык буруйу оҥоруу син тахсар эбит.

Ордук Уһук Илин эрэгийиэнигэр педофилия долгуна күүһүрбүтүн бэлиэтииллэр. Сокуоннай саастарын ситэ илик оҕолор доруобуйаларын айгыратан бииртэн биир буруйу оҥоруу олохтоохтору улаханнык долгутар.  Благовещенскай куоракка эр киһи сэттэ саастаах кыыһы дьүөгэтэ көрөн турдаҕына күүһүлээбит. Хабаровскай кыраайга дьыссаат иитээччитэ түүн утуйа сытар оҕону уһугуннаран баран күүһүлээбит. Ол кэннэ куораттан куоппут. Ити куоракка 2010 сыллаахха 32 саастаах киһи уулуссаҕа турар туалекка быһаҕынан куттаан туран бииргэ олорор дьахтарын 12 саастаах кыыһын күүһүлээбит. Кииринньэҥ аҕа баҕайы кыыһы маҕаһыыҥҥа баран иһэн таарыйа диэбит курдук, туалекка киирэн атаҕастаабыт. Бу киһибит бэйэтэ кыыһы күүһүлүү сатаан баран, аны эһиилигэр өлөрөрүнэн куттаан туран, 8 саастаах быраатын кытары сексуальнай дьайыылары оҥороллоругар күһэйбит. Камчаткаҕа сайыҥҥы лааҕырга 14 саастаах обургу уол 8 саастаах кыыһы күүһүлээбит. Ону алта оҕо көрөн турбуттар.

Оскуолаҕа эмиэ...

Камчаткатааҕы Петропавловскайга 36 саастаах киһи икки кыыһы күүһүлээбит. Ол курдук, бу киһи былырыын сэтинньи 23 күнүгэр бу куорат биир оскуолатыгар тоҕус саастаах икки кыыһы кылааска киллэрэн күүһүлээбит. Силиэстийэҕэ биллибитинэн, буруйдаах оскуолаҕа бордууһунанан киирбит. Баҕайы быһаҕынан куттаан туран кыра кыргыттары күүһүлээбит. Хата, полициялар педофил ир суолун ирдээн, тутан ылбыттар. Уорууга түбэһэн, хаайыыга сытан баран саҥардыы босхоломмут киһи эбит. Мэдиссиинэ эспэртиисэтин түмүгүнэн бу киһи күүһүлүүр кэмигэр наркотиктаан сылдьыбыта быһаарыллыбыт.

Камчатка кыраайын борокуратуурата бу киһийдэх оскуолаҕа хайдах киирэн хаалбытын, харабыллар баалларын-суохтарын, түннүктэрэ эрэһиэҥкэлээх дуу, суох дуу диэн чинчийбит. Олохтоохтор күрүлүүр күнүс оскуолаҕа барбыт оҕолоро маннык ыар күүһүлээһиҥҥэ түбэһэллэрэ, наркоман хаайыылаахтар оскуолаҕа “көтөн” түһэллэриттэн “шок” ылбыттар. 

Бу иннинэ, ол эбэтэр сэтинньи 15 күнүгэр, Соҕуруу Сахалин куорат оскуолатын бастакы кылааһын үөрэнээччитэ бастакы уруок кэмигэр туалеттыы тахсыбыт. Онно кимэ биллибэт эр киһи саба түһэн сексуальнай дьайыылары оҥорбут. Кыыс киэһэ ийэтигэр кэпсээбит. Сонно тута полициялар фоторобот оҥорон хас муннук аайы ыйаабыттар. Бу быһылаан кэнниттэн Сахалин уобалаһын күбүрүнээтэрэ Александр Хорошавин оҕо тэрилтэлэригэр:  дьыссааттарга, оскуолаларга, спортсаалларга – кэтээн көрөр тэрили (видеонаблюдение) туруортарбыт.

Оҕо оскуолаҕа даҕаны көмүскэлэ суох эбит. Биһиги дойдубут оскуолаларыгар түбэһиэх дьон үлэлииллэрэ кистэл буолбатах. Биир үксүн оробуочайдар, техүлэһиттэр. Холобур, Дьокуускай куорат оскуолаларыгар кэлии дьон (омуктар) оскуола тиэргэнигэр үлэлээбитэ буола сылдьалларын киһи элбэхтик көрөр.  Докумуоннаахтара, көҥүллээхтэрэ биллибэт. Балаҕан ыйын саҥатыгар Дьокуускай үс оскуолатыгар кэлии омуктар туох да көҥүлэ суох үлэлии сылдьалларын туппуттар этэ. Оскуола салайааччылара тугу өйдөөн-санаан маннык дьону ылалларын киһи сөҕөр. Бу дьонтон киһи тугу баҕарар күүтүөн сөп.

Таҥараҕа тиксиэххин баҕараҕын дуо?

Былыр, өрөбөлүүссүйэ иннинэ, итирик аҕабыыттар: “Таҥараҕа тиксиэххин баҕараҕын дуо?” – дии-дии, тыа нүкэн дьахталларын төһөлөөх албыннаан таҕылларын ханнарбыттара, күүһүлээбиттэрэ буолуой?! Сүүрбэ биирис үйэҕэ Аллараа Тагил аттынааҕы Покровскай диэн кыракый дэриэбинэҕэ таҥара үлэһитэ сонно сиэркэпкэ алта оҕону күүһүлээбит. Бу киһи 1997 сыллаахха киһини өлөрөн тоҕус сылга хаайылла сылдьыбыт эбит. Ол гынан баран “үчүгэй бэрэдэктээх” диэн, эрдэ босхолообуттар. Бу таҥара дьиэтин үлэһиттэрэ хаайыыга сыта сылдьыбыт киһини, баҕар, көнөр суолга үктэниэ диэн, аһынан үлэҕэ ылбыттар. Сиэркэпкэ араас үлэни бары үлэлээбит. Миэбэл да өрөмүөннээбит, муоста да сууйбут. Ханна да барар-кэлэр сирэ суох буолан, онно дугуйдаммыт.

Бу киһи дэриэбинэ эргэ хараамыгар олорон 8-12 саастаах уолаттары ыҥыртыыр эбит. Педофил кыра уолаттары ыҥыртаан баран таҕылын ханнарар араас дьайыыны оҥортуур, күүһүлүүр эбит. Икки оҕо ону кэпсээн биэрбиттэр. Төрөппүттэр, биллэн турар, түрүлүөн түһэрбиттэр. Свердловскай уобалас полициялара педофилы, хата, үлэлиир сириттэн тараччы тутан ылбыттар. Буруйдаах тутуллан баран ыар дьайыыларын толору билиммит. Силиэдэбэтэл эппитинэн, алта уолу күүһүлээбитэ биллибит. “Кэмпиэт сиэххин баҕараҕын дуо?” диэн ымсыырдан ыҥыртыыр эбит. Уолаттар сиэркэпкэ тэлгэһэ харбаан, от хомуйан өрүү көмөлөһөр эбиттэр. Төрөппүттэр сибэтиэй миэстэҕэ маннык сидьиҥ быһыы-майгы тахсыа диэн төбөлөрүгэр да оҕустаран көрбөтөхтөр. Ити кэннэ ханнык төрөппүт оҕотун таҥара дьиэтигэр ыытыай?! 

Дьэ, иэдээн...

Киһи ситэн аахпат ынырык хартыыната. Урут маннык ыар буруйу оҥоруу соччо иһиллибэт этэ. Сирбит тиэрэ эргийбит дуу, салгыммыт сүһүрбүт дуу?! Педофилия Арассыыйа үрдүнэн сыстыганнаах ыарыы курдук киэҥник тарҕанан эрэр. Хас күн аайы маннык ыар быһылаан тахсар диэтэхпинэ, сымыйа буолбата буолуо... Аны туран, буруйу оҥорооччулар үксүлэрэ урут хаайыыга сыта сылдьыбыт эбэтэр итириксит дьон. Мантан эрэсидьибиистэр хаһан да өйдөммөттөрүн, арыгы содула бииртэн биир алдьархайы аҕаларын өссө төгүл итэҕэйдибит.