Бултааһын буолбатах, кыдыйыы

07.05.2013 16:37 | Автор: Кыым | Көрдүлэр: 2537   
Печать

69898_copyКыахтаах, баай-тот дьон хоту улуустарга, ордук Халымаҕа эҥин, баран куһу-хааһы сүүһүнэн сиҥнэрэн кэлэллэрин туһунан сурахтары уруккуттан да истэбит. Холобур, быйыл кыһын балыыһаҕа көрдөрүнэр уочаракка бэрт дэлэй сэһэннээх дьон быыһыгар олорон, биир киһи эдэр сылдьан бултаабытын кэпсии олорорун иһиттим. Кинилэр иккиэ буолан хоту бара сылдьан хас да күн устата 200-түү андыны күөрэтэн суулларбыттар.

Ону истэн, бэркиһээн “оччо элбэҕи барытын дойдугар тиэйэн аҕалаҕын дуу?” диэн ыйыппыппар, киһим кыбыһынна быһыылаах, “суох буоллаҕа” эрэ диэн баран туран баран хаалла. Бу кэпсиир киһим сааһын тухары салайар үлэҕэ, үрдүк хамнаска сылдьыбыт киһи. Ол да иһин итинник “кыайыылаахтык” сырыттаҕа буолуо. Оттон биһиги, холкуос-сопхуос боростуой үлэһиттэрэ, ханнык кыахпытынан оннук сааланыахпыт буоллаҕай...

Киһи иҥсэтинэн адьырҕа кыылы сабырыйара өйдөнөр. Сиэмэх кыыллар, онно холоотоххо, айахтарын эрэ туһугар сордоноллор. Оттон биһиги биир уоспутунан “айылҕаны харыстааҥ” дии олорон, соҕурууттан хас эмэ тыһыынчанан биэрэстэ сири көтөн кэлбит көтөр муҥнааҕы “сэриини биллэрэн” көрсөбүт. Саатар, биир эмэ сыл куһу бултаабакка сынньата түспүт, таарыйа, булт сезонун саҕана алдьатыылаах арыгы аһы бобон кэбиспит киһи баар ини. Кус-хаас дэлэкээн эбиллиэ, дэҥ-оһол хайдахтаах курдук аҕыйыа этэй!

                                                                                            Н.Кокорев, Нам, Хамаҕатта.