Сылыктааччылар “сылыктарынан”...

13.12.2012 13:42 | Автор: Кыым | Көрдүлэр: 2444   
Печать

winter_yakutsk_05Кыһыммыт обургу тымныытын-дьыбарын соспутунан тиийэн кэллэ. Ол эрээри, күнү-дьылы сылыктааччылар “сылыктарынан”, баччааҥҥа диэри Дьокуускай куоракка -40 кыраадыска тиийбэккэ турар курдук. Төһө эмэ ыаллар дьиэлэригэр турар термометрдара  -45-47 диэн көрдөрөн турбутун иһин, “сылыктааччылар” хаһан да -40 кыраадыстан таһаарбаттар. Инньэ гынан, күн-дьыл туругун араадьыйаҕа-тэлэбиисэргэ кэпсииллэриттэн дьон күлэр эрэ буолла.

Холобур, Дьокуускайтан көстөн турар Аллараа Бэстээххэ, Павловскайга уо.д.а. -40 кыраадыстан тахсыбытын туох да түөкүннээһинэ суох аһаҕастык биллэрэллэр, онон сибээстээн кыра оҕолор оскуолаҕа үөрэнэ барбат эҥин буоллахтарына, Дьокуускай куорат туспа ыйдаах-күннээх, ичигэс сиргэ олорорун курдук. Дьиҥинэн, ити икки ардыгар туох улахан араастаһыы баар үһү.

Сорох билэр дьон “сокуон быһыытынан, -40 кыраадыстан таҕыстаҕына, ханнык эрэ тэрилтэлэр (сэрэйдэххэ, таһырдьа үлэлиир эҥин буолуо) үлэлээбэттэр, эбэтэр тымныыга үлэлииллэрин иһин эбии харчы эрэйиллэр, ол иһин кыраадыһы сымыйанан кыччаталлар” дииллэрин истэбин. Ону мин билбэппин гынан баран, ылыныллыбыт бэрээдэк толоруллуохтаах. Холобур, ити сылыктааччылар көмөлөрүнэн, төһө эмэ -50-ча кыраадыс түһэн бытарыта турбутун иһин, 1-3-с кылаас оҕолоро эрэйдээхтэр оптуобустарга тоҥо-хата сылдьар буолаллар. Бачча тымныыга кыра оҕо үлүйэн эҥин-дьүһүн буолан хааллаҕына ким эппиэттиирий?

Сорох арҕааҥҥы дойдуларга сымыйа борогунуоһу эппит, сир хамсааһына буоларын кэмигэр сэрэппэтэх уо.д.а. метео-сулууспа үлэһиттэрин сууттууллар, хаайаллар. Син биир ол курдук, холобур, Дьокуускай куоракка ханнык эрэ уопсастыбаннай хонтуруол тэрийэн, ким да мөккүспэтин курдук кыраадыс кээмэйин сиэрдээхтик эспэртиисэлээн баран, үлэлэрин сатаабат буолан дуу, соруйан дуу кыраадыһы намтатар метео-сулууспалары эппиэккэ тардар кыаллыбата буолуо дуо?

 

Егор Ермолаев,

Дьокуускай олохтооҕо.