Дьокуускай куорат таһынааҕы промышленнай Хаҥалас бөһүөлэк таһыгар үөскээбит муус харыытын туоратар дэлби тэптэрии үлэлэрэ ситиһиилээхтик түмүктэннилэр. Ол туһунан куорат дьаһалтатын пресс-сулууспата иһитиннэрдэ, Дьокуускай куораттааҕы Гражданскай Көмүскэнии уонна Ыксаллаах Быһыы майгы сулууспатыгар сигэнэн.
«Бүгүн ыам ыйын 18 күнүгэр, муус харыытыгар Хаҥалас бөһүөлэгин алын өртүнэн, дэлби тэптэрии үлэлэрэ ситиһиилээхтик ыытылыннылар, Өлүөнэ өрүскэ Нам улууһун Үөдэй бөһүөлэгин аннынан киэһэ 18 чааска муус барда. Ыам ыйын 18 күнүгэр муус харыыта үөскүөн сөптөөх кутталлаах учаастактарын кэтээн көрүү салҕанар», - диэн этиллэр иһитиннэриигэ.
Табаҕа сэлиэнньэтин уонна Хаҥалас бөһүөлэгин таһынан муус хойуутук устар. Дьокуускай аннынан муус устуута – орто.