Ийэ хапытаалын дьиэни-уоту, олорор усулуобуйаны тупсарынарга туһанар буоллахха, отчуота судургутуйуоҕа. Мантан антах хапытаал харчытынан дьиэни-уоту өрөмүөннэммит, туттарбыт туһунан аагы Биэнсийэ пуондатыгар отчуоттуур наадата суох буолбут. Ол туһунан бу күннэргэ дойду бырабыыталыстыбата иһитиннэрдэ.
Акт оннугар сир учаастага уонна онно тутуллубут дьиэ-уот эн бас билиигэр баарын туоһулуур Росреестр ыспыраапкатын ирдиэхтэрэ. Эбии докумуон, Росреестрэн атын сиргэ ханна эрэ сүүрэн-көтөн сибидиэнньэни хомуйар, отчуоту суруйар наадата суох.
Санаттахха, 2020 сыл муус устар 15 күнүттэн ийэ хапытаалын сэртипэкээтэ сайабылыанньата суох оҥоһуллар буолбута. Оҕо төрөөтөр, докумуона оҥоһулуннар эрэ, сэртипэкээти “Госуслуги” порталга ийэтин анал кэбиниэтигэр тустаах уорганнар бэйэлэрэ ыыталлар.
2021 сылтан ийэ хапытаалын кээмэйэ бачча буолбута: бастакы оҕоҕо – 483 882 солк., иккискэ – 639 432.