“АЛРОСА” АХ үлэһиттэригэр уонна кинилэр дьиэ кэргэннэригэр сөптөөх үлэлиир усулуобуйаны тэрийэр дьүккүөрдээх, Саха сирин социальнай инфрастуктуратын сайыннарыыга хампаанньа үтүмэн үбү көрөр. Бу үлэ күлүүс суолталаах хайысхата – успуорду уонна култуураны өйөөһүн. Мииринэй оройуонугар бу этиллэр үлэ баһырхай өлүүскэтин АЛРОСА култуура-успуорт холбоһуга (мантан салгыы – КСК) толорор.

КСК бу үүммүт 2021 сылга туох былааннардааҕын, ону тэҥэ тэрилтэ былырыыҥҥы хамсык кэминээҕи судургута суох балаһыанньаҕа хайдах-туох үлэлээн кэлбитин бүгүн биһиэхэ тэрилтэ дириэктэрэ Мотрена Скрябина кэпсиэҕэ.

Күн бүгүн АЛРОСА култуура-успуорт холбоһугун көрүүтүгэр-истиитигэр уопсайа 14 успуорт тутуута, култуура 7 эбийиэгэ киирэр.

БАРД-ЫРЫА КУЛУУБУТТАН САҔАЛААН ЦИРКЭ УСТУУДЬУЙАТЫГАР УОННА ОҔО БАЛЕТЫН ТЫЙААТЫРЫГАР ТИИЙЭ

– “АЛРОСА” КСК тутулугар Мииринэй оройуонун куораттарыгар уонна бөһүөлэктэригэр үлэлиир успуорт саалалар, бассыайыннар, мусуойдар, култуура дыбарыастара уонна култуура дьиэлэрэ киирсэллэр. Итинтэн култууратын арааран этэр буоллахха, ордук ханнык хайысхаларга тиһиктээх үлэ барарый?

– АЛРОСА КСК салаалара хампаанньа үлэлиир былаһааккатыгар барытыгар баар – Мииринэйгэ, Айхалга, Удачнайга, Арыылаахха уонна Алмазнай бөһүөлэккэ. Итилэргэ бастайааннай өрүккэ үлэлиир уус-уран самодеятельность 72 түмсүүтэ (араас куруһуоктар уонна ансаамбыллар) 7 айар хайысхаҕа ылсан үлэлиир. Манна 1500-тэн тахса киһи сөбүлээн дьарыктанар, биһиги Мииринэй оройуонун бары олохтоохторугар ааммыт аһаҕас. Ити 1,5 тыһ. тахса киһиттэн баһыйар өлүүскэтэ, о.э. 1100-һэ – оҕо, 400-һэ – улахан дьон. Биһиэхэ араас үҥкүү, вокал, үстүрүмүөн уонна тыйаатыр кулууптара үлэлииллэр. Ол иһигэр Удачнайга – “Полярный круг” оҕо циркэтин кэлэктиибэ, Мииринэйгэ – “Алмазы Якутии” оҕо балетын тыйаатыра.

Бу балар бары тустаах, түстэммит миэстэлэригэр айа-тута, үлэлии-хамсыы олорор буолан, нэһилиэнньэ олоҕун сырдаталлар, сэргэхситэллэр. Биир тылынан эттэххэ, кинилэр култуура дьиэтин ис кута, дууһата суолталаахтар диэххэ сөп. Онон хайаларын эрэ ордук ойуччу тутан бэлиэтиир уустук. Кинилэртэн үгүс өттүлэрэ өрөспүүбүлүкэ, эрэгийиэн, федерация таһымнаах араас күрэхтэргэ, күөн күрэстэргэ көхтөөхтүк кыттан, араас миэстэлэри ылан кэлэллэр. Биһиги кинилэринэн олус диэн киэн туттабыт.

Баҕар, ким эрэ ханна эрэ ыраах, Саха сирин арҕаа эҥээрин дьоҕус куоратыгар балет курдук үрдүк ускуустубанан дьарыктанар кыах баарын сөҕө да саныан сөп. Тоҕо диэтэххэ, итинник кыах, усулуобуйа, бэл, улахан куораттарга суох. “Алмазы Якутии” оҕо балетын тыйаатыра төрүттэммитэ хайыы үйэ 30-тан тахса сыл буолла. Кырдьыга да, бу тыйаатыр – Мииринэй оройуонун киэн туттуута. Балет тыйаатырыгар уонна да атын үҥкүү сүрүн кэлэктииптэригэр оҕолор тутаах дьарыктарын таһынан рок-н-ролл үҥкүүнэн эбии дьарыктаналлар. Рок-н-ролл бары бөлөхтөрө – өрөспүүбүлүкэ уонна бүтүн Арассыыйатааҕы турнирдар хас да төгүллээх кыайыылаахтара уонна бириистээхтэрэ.

Нэһилиэктэр култуурунай олохторугар ким туох интэриэстээҕинэн көрөн, кулууп тэринэн үлэлиир түмсүүлэр улахан оруоллаахтар. Бу маннык түмсүүлэргэ чуолаан биэнсийэлээх, аҕа саастаах көлүөнэ дьиэ кэргэннэрин уонна оҕолорун-сиэннэрин кытта сөбүлээн дьарыктаналлар. Уопсай интэриэс көмөтүнэн эдэр уонна аҕа, орто саастаах көлүөнэлэр туһалаах алтыһыылара табыллар.

Маны тэҥэ “Зеленая карета” бард ырыа кулуубун бэлиэтээн аһарыам этэ, бу манна ырыа матыыбын, тылын-өһүн барытын бэйэтэ чочуйар, гитараҕа оонньуур, ыллыыр ааптар дьарыктыыр.

Оттон уонна биһиэхэ национальнай айар кэлэктиип, биллэн турар, элбэх. Кинилэр миэстэтигэр олорон эрэ төрөөбүт нэһилиэктэрин күннээҕи олоҕун култуурунай тэрээһиннэринэн сэргэхситээччи, сырдыкка көҕүлээччи буолаллар. Бары даҕаны тыа сирин кулуубун, култууратын дьиэтин тутаах кута-сүрэ суолталаахтар. Онон хайаларын эрэ ордук чорботон, уһулуччу тутан ааттыыр уустук курдук. Мииринэй оройуонун айар кэлэктииптэрэ бары Саха сиригэр уонна өрөспүүбүлүкэ тас да өттүгэр тэриллэр араас тэрээһиннэргэ, куонкурустарга, бэстибээллэргэ көхтөөхтүк кытталлар.

– Балаһыанньа тупсуу өттүгэр баран, арааһа, үлэ-хамнас сөргүтүллэн эрэр диэххэ сөп буолуо. Итинтэн сиэттэрэн: үлэ хайдах быһыылаахтык барыай? Баҕар, туох эмэ саҥаны, сонуну киллэрии баара буолаарай?

– Биһиги былырыын, аан дойдуга бүттүүнүгэр да курдук, хамсык хааччаҕыттан атыннык дьаһанан үлэлииргэ күһэллибиппит. Ол курдук, култуура өттүгэр үлэбит кэккэ чааһын онлайн эрэсиимҥэ көһөрөн биэрбиппит, сороҕун тохтото түһэргэ быһаарбыппыт. Холобур, үҥкүү дьарыгын онлайҥҥа көһөрүү уустук. Ол гынан баран, бу көрүҥ үлэҕэ сөп түбэһэ сатыырга кыһаллыбыппыт. Интэриниэт хаачыстыбатыттан сэдиптээн барыта биһиги былааннаабыппыт курдук буолбатаҕа. Ол да буоллар биһиги онлайн-формаппытыгар Саха сириттэн эрэ буолбакка, Арассыыйа атын эрэгийиэннэриттэн эмиэ кытталларын ситистибит. Ол иһин, хамсык иннинэ ыытар тэрээһиннэрбитин оройуоммутугар ыытар эбит буоллахпытына, билигин атын эрэгийиэннэртэн эмиэ кытталлар. Онон биһиэхэ үлэ эбиискэ уопута эбилинэ, ону кэнэҕэһин да туһаныахпыт турдаҕа.

Күн бүгүҥҥү туругунан, 55 кэлэктиип урукку үлэлиир чөлүгэр түһэн, үлэлээн эрэллэр. Ол эрээри хамсыктан сэрэхтээх буолуу хааччаҕын хайаан да тутуһаллар. Ол эбэтэр, эрэпэтииссийэлэнэр саалаҕа 15-тэн элбэх киһи мустуо суохтаах. Ону тэҥэ ыарыыттан сэрэхтээх буолуу ирдэбилэ булгуччу тутуһуллар. Саньытаарынай-эпидемиологическай ирдэбили кэтээн көрөр хамыыһыйа, бэрэбиэркэ бастайааннай өрүккэ оҥоһуллар. Куруһуок диэн – формальнайа суох эйгэ, холобур, оскуолаҕа холоотоххо, манна, дьиҥ олоххо социальнай уопуту атастаһыы, алтыһыы быдан киэҥник барар. Бу чааһыгар КСК салалтата ыытар, тэрийэр үлэтэ муҥутуурдук толкуйданан, сөпкө аттарыллан ыытыллара наада. Бу барыта – оройуон олохтоохторун доруобуйатын харыстыыр туһугар оҥоһуллар.

САХА СИРИН НОРУОТТАРЫН ТӨРҮТ КУЛТУУРАТЫН ҮЙЭТИТИИ

– Саха сирин омуктарын төрүт култууратын үйэтитии өттүгэр КСК эмиэ үлэлэһэр. Бу туһунан билиһиннэрэ түспэккин ээ.

– КСК салаа тэрилтэлэригэр саха норуотун уус-уран айымньытын самодеятельноһын 13 кэлэктиибэ баар, ол иһигэр хореография, норуот уус-уран оҥоһуктара, вокал, фольклор. Итиннэ 200-тэн тахса киһи дьарыктанар. Биһиги Саха сирин төрүт олохтоохторун үтүө үгэстэрин, култуураларын тарҕатыыга, үйэтитиигэ ураты болҕомтобутун уурабыт. Бу кэлэктииптэрбит айар үлэ үөһүгэр сылдьаллар, сайдаллар. Кинилэр КСК, АЛРОСА хампаанньа, Мииринэй оройуона уонна өрөспүүбүлүкэ ыытар култуурунай маассабай тэрээһиннэригэр өрүү да көхтөөхтүк кытталлар. Араас таһымнаах күрэстэр, күрэхтэр элбэх төгүллээх кыайыылаахтара буолаллар.

«Алмаз» ДК-ҕа норуот айымньытын устуудьуйатыгар олус баай устуоруйалаах айар кэлэктииптэр бааллар. Холобур, “Кустуур” норуот ансаамбыла бэлиэр отут сыл усталаах-туоратыгар көрөөччүлэрин сэргэх, интэриэһинэй туруорууларынан абылыыр. Оттон “Иэйии”, “Айылгы” уонна оҕолор “Чуораанчык” ансаамбыллар кыттыыта суох биир да бөдөҥ тэрээһин ааспат.

Биһиэхэ өссө “Арчы” уус-уран оҥоһук, айымньы кулууба баар. Ону тэҥэ бырааһынньыктары тэрийэргэ бэтэрээннэр “Арчы” кулууптара төһүү көмө буолар. Кинилэр олус көхтөөхтөр, туох баар тиэмэлэринэн ыытыллар бырааһынньыктарга үөрүүнэн кытталлар.

Удачнайга төрүт култуураны үйэтитиигэ “Дьэргэлгэн” үҥкүү ансаамбылын кытта “Кэскил” кулууп ыкса дьарыктаналлар. Оттон Айхалга ыытыллар тэрээһиннэри “Айталы” этно-фольклор бөлөҕө киэргэтэр. Арыылаах бөһүөлэгэр саха төрүт үгэстэрин, култууратын үс кэлэктиип иилиир-саҕалыыр: “Туой-Хайа” вокальнай ансаамбыл, “Чуона” үҥкүү кэлэктиибэ уонна “Северянка” бэтэрээннэр кулууптара.

Норуот айымньытын кэлэктииптэригэр саха үҥкүүтүгэр, вокалга дьарыктаналлар, куоластарын эрчийэллэр, араас национальнай үстүрүмүөннэргэ оонньууллар. Нэһилиэнньэҕэ анаан араас интэриэһинэй тэрээһиннэр буолаллар. Холобур, остуол оонньууларын киэһэтигэр хаамыскаҕа, хабылыкка ким бастыырын быһаарар күрэх, күөн күрэс тэриллэр, кэрэ аҥаардар күөрчэх ытыйарга күрэхтэрэ эмиэ дьон улахан сэҥээриитин ылар. Мииринэй оройуонугар национальнай общиналар кулууптарын тэрээһинэ киэҥ далааһыннаахтык барар, ол онно барыбытын бары да сөбүлүүр оһуохайбыт түмэр, сомоҕолуур. Быһата, КСК бары көҕүлээһиннэри, ыытыллар тэрээһиннэри толору өйүүр, үлэлэһэр.

«ТУОЙ ХАЙА» ЭСТРАДА ЫРЫАТЫН КҮӨН КҮРЭҔИГЭР ЭДЭР ТОЛОРООЧЧУЛАРЫ ЫҤЫРАЛЛАР

– Бэрт сотору саха эстрадатын ырыаларын толорор эдэр ырыаһыттар ортолоругар бэлиэр XXIX төгүлүн ыытыллар өрөспүүбүлүкэ таһымнаах “Туой Хайа” бэстибээлэ буолуохтаах. Быйылгы куонкурус Саха сиригэр биллэриллибит Доруобуйа сылыгар сыһыаран ыытыллар. Бэстибээл туһунан бэрт кылгастык сэгэтэ түһэн ааспаккын, туох сонуну көрүөхпүтүй?

– “АЛРОСА” КСК бу куонкуруһу быйыл аан бастакытын ыытар. Бу иннинэ атын тэрийээччилээҕэ, быйыл бэстибээли тэрийиини биһиэхэ биэрдилэр. Былырыын хамсык мэһэйдээн сатаан ыыппатахпыт. Билиҥҥи туругунан биһиги куонкурус тэрээһининэн күүскэ дьарыктана сылдьабыт. Төһө кыалларынан быдан элбэх саха эстрадатын эдэр ырыаһыттарын сэҥээрдэр, кытыарар баҕалаахпыт. Ол гынан баран хамсык хааччаҕа билигин да дьайарын быһыытынан, ыарыы тарҕанар куттала суоһаабатын туһугар бэстибээл булкаас (комбинированнай) форматынан барыаҕа.

Ол аата, бастакы уонна икки түһүмэхтэргэ күөн күрэс кыттааччылара онлайн-балаһааккаҕа – бу күрэскэ анаан-минээн оҥоһуллубут tuoihaya-ksk.ru саайка буолуоҕа. Бу маннык ыыттахпытына, биһиги санаабытыгар, өрөспүүбүлүкэ араас муннугар, ону ааһан, бэл, өрөспүүбүлүкэ тас өттүттэн кытта буолуон сөп, муҥутуур элбэх эдэр ырыаһыт кыттар кыахтаныа. Баҕалаах эрэ барыта ырыатын биидьийэҕэ устан ыытыан, күөн күрэскэ кыттыан сөп. Сайаапкалары олунньу 24 күнүгэр дылы туталлар.

Оттон бэстибээл үһүс түһүмэҕэр бириистээх миэстэлэргэ тиксибиттэр, номинация ылбыттар кыттыахтара. Оттон хайдах да сатаан кыттар, тутаах бириис иһин киирсэ кэлэр кыаҕа суохтар роликтарын финалга уонна гала-кэнсиэргэ хайаан да көрдөрүөхпүт.

Олоҕурбут үгэстэн туораабаппыт. Бэстибээл түмүктүүр чааһа кулун тутар 20 күнүгэр Арыылаах сэлиэнньэтигэр Култуура дьиэтигэр ыытыллыа. Ону таһынан, сарсыҥҥы күнүгэр, кулун тутар 21 чыыһылатыгар, Мииринэйгэ баар “Алмаз” култуура дыбарыаһыгар бары финалистар кыттыылаах гала-кэнсиэри былаанныыбыт, арай толорор ырыалара атын буолуоҕа. Ол кэмҥэ диэри бары хааччаҕы тутуһан туран, кэнсиэри ыытар көҥүлү ылар инибит диэн суоттанабыт. Ону таһынан бэстибээл онлайн-трансляцията «Алмазный край» теле-ханаалга уонна Youtube нөҥүө көстө туруоҕа.

Саҥаны киллэрии чааһын этэр буоллахха, быйыл 8-тан 16 саастарыгар диэри саастаах оҕолор эмиэ кыттар кыахтаналлар. Эрдэ бу куонкурус улахан эрэ дьоҥҥо ыытыллара. Бириис уопсай пуондата –500 тыһ. солк. тахса, итинтэн 200 тыһ. – Гран-при бирииһэ.

Билиҥҥи туругунан, саайт оҥоһулла сылдьар. Сотору силигэ ситэн, “Кыым” хаһыат ааҕааччыларыгар тиийэр кэмигэр, үлэлии турар буолуоҕа. Бэстибээли тэрийии туһунан сиһилии иһитиннэрии, ону таһынан кыттааччылар устан ыыппыт биидьийэлэрэ барыта ол саайтка тахсыаҕа.

УСПУОРДУНАН ДЬАРЫКТАНАР КЫАХ УЛААТАРЫН ТУҺУГАР

“АЛРОСА” АХ хампаанньа социальнай бэлиитикэтин биир тутаах хайысхата – баҕалаах эрэ барыта успуордунан дьарыктанар кыахтанарын ситиһии. Хампаанньа успуорка дуоспуруннаахтык сыһыаннаһар. Онно көннөрү сиэксийэлэри уонна күрэхтэри тэрийии эрэ буолбакка, араас бырагыраамаларга успуонсар буолуу эмиэ киирэр: успуордунан дьарыктаныыга субсидия көрүүттэн саҕалаан успуорт тэрилтэлэрин уонна норуоттар икки ардыларынааҕы улахан күрэхтэри өйөөһүҥҥэ тиийэ. Үгүс өттүгэр ол да иһин мииринэйдэр араас таһымнаах элбэх күөн күрэстэр, күөн көрсүүлэр чөмпүйүөннэрэ уонна бириистээхтэрэ буолаллар.

АЛРОСА сүрүн үлэтин Саха сиригэр ыытар, манна хапсаҕай, мас-рестлинг уонна көҥүл тустуу – успуорт национальнай көрүҥнэриттэн биир тутаахтара, суолталаахтара. Ол иһин 2019 сылтан саҕалаан,   КСК успуорт национальнай көрүҥнэрин сайыннарыыга ылсыбыта. Оттон хампаанньа бу көрүҥнэри өйүүрэ Мииринэй олохтоохторо бу көрүҥнэргэ дьарыктанар кыахтарын улаатыннарда. КСК-ҕа саҥа сиэксийэни арыйыах иннинэ, “АЛРОСА” АХ исписэлиистэрэ нэһилиэнньэ ортотугар ханнык успуорт көрүҥүнэн дьарыктаныаххын баҕараҕын диэн ыйытык ыыппыта, онно 4 тыһ. кэриҥэ киһи кыттыбыта. Ити ыйытык түмүгэ дьон ордук хапсаҕайынан, мас тардыһыытынан дьарыктаныахтарын баҕаралларын көрдөрбүтэ. Ол эбэтэр, хампаанньа уопсастыбаннас сакааһын толорор диэххэ сөп. Саҥа сиэксийэ үлэлии турар уонна чөмпүйүөннэри иитэн таһаарыыга үлэлэһэр. Бу манна СӨ хапсаҕайга успуорт маастара, РФ тустууга маастара Ларион Андреев өҥөтө улахан.

– Мотрена Вячеславовна, КСК успуорт эбийиэктэригэр күн бүгүн ханнык успуорт хайысхаларыгар дьарыктыылларый?

– Күн бүгүн успуорт 26 көрүҥэр уопсайа 52 сиэксийэ үлэлиир. Баларга оҕолор да, улахан да дьон дьарыктаналлар. Этэргэ дылы, успуорт диэн – олох, хамсааһын, чөл турук. Ол быһыытынан биһиги оҕолорбутун бары өттүттэн өйүү сатыыбыт. Аатырбыт спортсменнар кыттыылаах араас тэрээһиннэри, аахсыйалары, маастар кылаастары ыытабыт, спортсменнар атын сирдэргэ күрэхтэһэ барыыларын тэрийэбит. Оттон иллэрээ сылтан саҕалаан КСК успуорт национальнай көрүҥнэрин өйүүргэ уонна сайыннарыыга ылыста. Ол курдук, хапсаҕай уонна мас тардыһыыта биллэ тэнийэн эрэр.

Холобур, былырыын биһиги “АЛРОСА” АХ бирииһигэр Мииринэй оройуонуттан хапсаҕайга успуорт бастакы маастара А.И. Никифоров сырдык кэриэһигэр өрөспүүбүлүкэ таһымнаах бастакы турниры тэрийэн турабыт. Үчүгэй бириис пуондалаах олус интэриэһинэй тэрээһин буолбута дии саныыбыт. Билигин биһиги ити турниры сайын, аһаҕас халлаан анныгар, стадиоҥҥа иккис төгүлүн ыытаары бэлэмнэнэбит. Саха сирин Успуорка министиэристибэтин кытта үлэ барар турар. Өрөспүүбүлүкэ кыахтаах хапсаҕайдьыттарын күүтэбит. Турнир Доруобуйа сылыгар сыһыаран ыытыллыаҕа.

Ону таһынан, былырыын биһиги мас тардыһыытыгар куорат турнирыгар кыттыбыппыт. Кыайыылаахтарга Мииринэй баһылыгын уонна “АЛРОСА” АХ бирииһэ туттарыллар.

“АЛРОСА” КСК-ҕа национальнай успуорт көрүҥнэригэр дьарыктааһыны өйөөн, хампаанньа Мииринэй оройуонун олохтоохторо успуорка ситиһиилэниэхтэрин, өрөспүүбүлүкэ таһымнаах күрэхтэргэ күөн көрсөр кыахтаах тустууктар иитиллэн тахсыахтарын баҕарар. Бу көрүҥҥэ саҥа ылсан үлэлэһэр, ол да буоллар кыайыы кынаттанар кэм кэлэрэ ыраахтан буолуо суоҕа диэн эрэнэллэр.

– 2019 сылга КСК “Алмаастаах сүүрүү” диэн сонун аахсыйаны тэрийэн, бу иннинэ сүүрэр диэни билбэтэх дьон кытта сүүрэр көнөҕө тахсыбыттар этэ. Ол дуораана, бэл, Дьокуускайга тиийэ тайаан, манна кытта буолбута. Быйыл итинник сүүрүү тэриллиэ дуу?

– Тэриллиэ, биһиги “Алмаастаах сүүрүүбүтүн” кэнэҕэһин да салгыы ыытар уонна сайыннарар былааннаахпыт. Уопсайынан, сүүрүүнү тэнитэр, көҕүлүүр баҕалаахпыт. Сүүрүүнү таптааччылар ханна баҕарар бааллар, тарҕаммыт успуорт көрүҥэ буолар. Быйыл биһиги “АЛРОСА” АХ салаа тэрилтэлэрин уонна кыыс-уопсастыбаларын үлэһиттэриттэн дьоҕус бөлөҕү тэрийэн, уһун дистанцияҕа сүүрэри таптааччыларга ыытыллар Москубатааҕы Марафоҥҥа кытыннарарга быһаарбыппыт.

КИИНЭ БИЛИЭТИН УОННА УСПУОРТ АБОНЕМЕНЫН– «ЕДИНАЯ КАРТА КЛИЕНТА» МОБИЛЬНАЙ СЫһЫАРЫЫ НӨҤҮӨ

– Хамсык хааччахтаах усулуобуйатыгар дьон эрчиллэр дьарыкка хайдах сурутан кэлэллэрий?

– “Сыыппараҕа” көһүү чэрчитинэн, биһиги КСК өҥөтүн иһин төлөһөргө анал мобильнай сыһыарыыны оҥорбуппут. Бу сыһыарыы көмөтүнэн эрчиллиигэ сурутар, ону таһынан өссө киинэҕэ миэстэ уурар бронь, атыылаһар кыах бэриллэр. Бу маннык дьаһаныы, бастатан туран, хаассаҕа уочарат үөскүүрүн суох оҥорор, бу ковид кэмигэр олус наадалаах түгэн. Иккиһинэн, дьоҥҥо олус табыгастаах. Билиэт ылыам этэ диэн хааман испэккин, иһитиннэрии көрдөөн сүүрбэккин. Бириэмэни халтайга ыыппаккын.

Билиҥҥи туругунан, бастайааннай өрүккэ бөлөхтөргө уонна сиэксийэлэргэ уопсайа 3500-тэн тахса киһи дьарыктанар – бу чопчу үөрэнэр былааннаах уонна араспысаанньалаах бөлөхтөргө.

Итинник өҥө эрчиллэр саалаларга, фитнескэ, бассыайыҥҥа көрүллүбэт. Оттон тустаах тиһиккэ уопсайа төһө киһи регистрацияламмытай диир буоллахха, биһиги өҥөбүтүнэн туһанар 11 тыһ. тахса киһи баар.

«ОРЛЕНОК» ОҔО ЛААҔЫРА УОННА ЭДЭР СПОРТСМЕННАР СЫННЬАЛАҤНАРА

– Оттон оҕо сайыҥҥы сынньалаҥа эһиги көрүүгүтүгэр баар дуу?

– 2021 сылтан «Орленок» оҕо сайыҥҥы чэбдигирэр лааҕыра КСК састаабыгар киирэр. Быйыл биһиги 14-түү күн уһуннаах түөрт симиэнэни былаанныыбыт. Ол иһигэр биирэ – “английскай” симиэнэ буолуоҕа.

Оҕолору бэйэбит лааҕырбытыгар эрэ буолбакка, хас сыл аайы КСК куруһуоктарыгар уонна сиэксийэлэригэр дьарыктанар 200 курдук оҕону өрөспүүбүлүкэ тас өттүгэр ыытан сынньатабыт. Маныаха төрөппүттэргэ көрүллэр путевка буор босхо. Арай айаннарын сыанатын уйуналлар. Оҕолору кытта кинилэр тириэньэрдэрэ уонна ансаамбылларын эбэтэр куруһуоктарын уус-уран салайааччылар эмиэ барсаллар. Онон биһиэхэ дьарыктанар оҕолор көннөрү сынньанар эрэ буолбатахтар, сайыҥҥы каникул кэмигэр сөбүлүүр дьарыктарынан, успуорт көрүҥүнэн холкутук дьарыктанар кыахтаахтар.

Андрей ШИЛОВ  суруйуутуттан тылбаас.